Na área etnográfica da Insua encóntrase o antigo cargadoiro das Minas da Silvarosa. Actualmente, só quedan restos de arqueoloxía industrial das tolvas e do tranvía aéreo bicable, sistema Bleichet, de 5 quilómetros de lonxitude, que servía para transportar o mineral, aproveitando o desnivel da ladeira ata o mar. Alí, almacenábase en grandes tolvas.
A través dun túnel recollíase e lavábase para facelo chegar a unha estrutura de ferro, que se adentraba no mar onde se volcaba directamente nas embarcacións. Unha vez cargado directamente nos vapores de transporte, enviábase con destino a Alemaña, Holanda e Inglaterra, principalmente en tempos de entreguerras, debido á dureza do ferro, co obxectivo principal de facer canóns e balística.
O Concello de Viveiro é consciente da importancia da zona, de gran valor etnográfico, turístico e nacional. Por iso, o goberno local impulsa o acondicionamento da instalación, dende onde se poden observar unhas magníficas vistas da ría de Viveiro e, incluso, asomarse polo antigo cargadoiro, rehabilitado nunha parte da súa lonxitude orixinal.
