Musiqueando program máis dun cento de actuacións entre os meses de xullo e novembro

Lugo, 15 de xullo de 2020. Máis dun cento de asociacións e concellos solicitaron actuacións de grupos tradicionais, bandas e corais dentro do programa Musiqueando, promovido pola Vicepresidencia da Deputación de Lugo para incentivar a presenza da música tradicional nas celebracións populares. A demanda de actuacións duplicouse a respecto á pasada anualidade, na que a situación sanitaria reduciu o número de peticións rexistradas.

A Vicepresidencia da Deputación destaca a colaboración e o interese amosado polas asociacións e concellos para dar continuidade a esta programación musical que incluirá máis dun cento de actuacións polas distintas comarcas entre os meses de xullo e novembro.

As actuacións correrán a cargo das preto de setenta agrupacións que se inscribiron na convocatoria: 40 grupos de música tradicional, 12 corais e 16 bandas, que reúnen preto de 1.000 voces e instrumentistas do ámbito profesional e amador. Musiqueando dá así pulo a un tecido de agrupacións que facilitan o acceso á música en todo o territorio e desenvolven unha importante labor fomativa, mantendo entre a súa actividade clases de música e baile.

Desde a área de Cultura, incentivouse a participación ofrecendo a entidades programadoras e agrupacións as mesmas facilidades que na convocatoria de 2020. Dun lado, a entidade provincial asume o cento por cento do custo das actuacións, liberando do investimento a concellos e asociacións; doutro, no caso de que as circunstancias sanitarias impidan celebrar as actuacións concertadas ao vivo, os grupos teñen a opción de facer unha gravación audiovisual para difundir a través das canles dixitais da Vicepresidencia da Deputación de Lugo.