Finalizou este mércores en Lourenzá o ciclo de catas …E para comer, Lugo no Camiño

Lugo, 5 de maio, 2021. A Asociación Provincial de Empresarios de Hostalería e Turismo de Lugo (Apehl) ten en marcha a celebración por segundo ano consecutivo do Congreso Gastronómico e Cultural …E para comer, Lugo no Camiño, unha xornada sobre a cultura gastronómica dos Camiños de Santiago ao seu paso pola provincia de Lugo que terá lugar no Museo Interactivo da Historia de Lugo (MIHL) o 29 de maio. Esta iniciativa forma parte do programa O Teu Xacobeo.

Como introdución ao Congreso, celebráronse tres Catas …E para comer, Lugo no Camiño en Portomarín, Quiroga e hoxe en Lourenzá.

Esta última sesión foi impartida de 16:30 a 19:00 horas por Juanjo Figueroa, titor do Curso Superior de Sumiller Profesional do Instituto Galego do Viño, nivel 3 da Wine & Spirit Education Trust (WSET) e representante de Galicia no Campionato de España de Sumilleres ata en cinco ocasións.

CONGRESO
O prazo de inscricións para asistir ao II Congreso Gastronómico e Cultural …E para comer, Lugo no Camiño está aberto.

Aqueles que queiran participar nesta iniciativa, cuxas prazas son limitadas para cubrir coas limitacións de aforo, deben inscribirse a través do teléfono da Apehl 982 22 69 12 ou desde a web apehl.org.