Sinalan que en marzo e abril, a Administración, con absoluto desprezo ao risco de incendio dadas as condicións meteorolóxicas que se estaban a producir, decidiu levar a cabo queimas supostamente preventivas que incluso nalgúns casos saltaron das áreas previstas dando lugar a incendios forestais que destruíron importantes superficies de terreos protexidos e de grande valor ambiental.
Os feitos son esclarecedores, foron reflexados no seu día nas crónicas da prensa e non dan lugar a dúbida. Equipos da Consellería do Medio Rural co apoio da UME provocaron incendios na Serra do Courel (Lugo), afectando a unha considerábel superficie neste espazo protexido, e no Monte Muradal, no Concello da Fonsagrada, en plena Reserva da Biosfera de Oscos-Fonsagrada-Terras de Burón.
Non é a primeira vez que estas prácticas perigosas co lume provocan incendios de importancia. A Administración galega non é descoñecedora dos riscos que conlevan as queimas nin das desastrosas consecuencias para hábitats de tanto valor ecosistémico como os arrasados polos incendio do pasado mes de abril.
Estos incendios causaron graves danos a estos ecosistemas e para a extinción dos mesmos foi necesario un importante gasto. Só no caso do incendio producido na Serra do Courel tivéronse que mobilizar 5 helicópteros, 2 avións de carga en terra, buldózeres e varias motobombas e brigadas forestais.
Ao xuízo da plataforma estos incendios non se poden considera lumes fortuítos produto da fatalidade, senón que son o froito dunha grave neglixencia con responsabilidade criminal por parte da Administración, unha neglixencia merecedora dun sanción penal contundente.
“As denominadas “queimas preventivas” resultan ser claramente prexudiciais cando, como nestes casos, se realizan en épocas de grave risco de incendio, de grave perigo para a conservación da fauna e en áreas destinadas á protección” -recalca Benito Andrade, membro da plataforma “Por un Monte Galego con Futuro”- “Existen alternativas ao uso do lume que son practicadas en territorios da Unión Europea e que permiten o manexo seguro dos ecosistemas”.