O PP pide o arranxo da deteriorada estrada do Cadramón, a LU-P 6305

Lugo, 30 de abril de 2021. O goberno provincial, presidido polo socialista José Tomé, non dubida en usar como recurso político cando lle interesa o combate contra o despoboamento de amplas zonas do rural lucense. Pero, á hora da verdade, nada fai a Deputación para fixar poboación. Un recurso esencial para conseguilo e que as infraestruturas de comunicación estean en bo estado. E xustamente o contrario ocorre no Cadramón (O Valadouro) coa estrada provincial LU-P 6305, que está absolutamente desfeita, ata o punto de que para circular por ela é preciso facelo en vehículos todo terreo. O portavoz provincial do PP, Javier Castiñeira, insta ao presidente da Deputación a adoptar as medidas necesarias para reparar a citada vía, como piden insistentemente os veciños afectados.

Castiñeira explica: “Os veciños de O Cadramón, no concello de O Valadouro, reclaman á Deputación de Lugo que arranxe canto antes a estrada provincial LU-P 6305, que dá acceso a vivendas, montes comunais con gando e a parques eólicos, así como ao repetidor de televisión. Esta estrada está en moi mal estado, abandonadísima; é unha estrada de montaña e tal como está é perigosa. É unha estrada perigosa, que dá servizo a veciños de núcleos do interior da zona da montaña de O Valadouro”

O mesmo responsable popular sinala que na LU-P 6305 “as fochancas son enormes, de maneira que está impracticable”. Afirma: “ É necesario circular por ela en vehículos todo terreo. Chegou o momento de arranxar esta vía, porque non se fixo mantemento durante os últimos anos”. Lembra que o grupo provincial do PP presentou un rogo na Deputación para solicitar a reparación desta vía, “e pedímolo agora publicamente”. Castiñeira destaca que “os veciños están cansos de que non lles fagan caso, tal e como nos explicou Xosé Manuel Lamela, voceiro do PP en O Valadouro. “Están fartos de que ninguén lles faga caso; esperemos que a Deputación se tome en serio esta demanda dos veciños e arranxe canto antes esta estrada”, sinala Javier Castiñeira.