Daniel Vega agradece a visita da directora xeral do Agader á Praza de Abastos de Ribadeo onde a Xunta investiu preto de 40.000 euros para a súa mellora

Ribadeo, 8 de abril, 2021. O voceiro do Grupo Municipal Popular de Ribadeo, Daniel Vega, agradece a visita da directora xeral da Axencia Galega de Desenvolvemento Rural, Inés Santé, á Praza de Abastos de Ribadeo onde este departamento autonómico investiu para a súa mellora preto de 40.000 euros, o que supón o 80% do orzamento.

As obras permitiron mellorar o pavimento, a adecuación da iluminación interior, a mellora dos aseos, desaugadoiros, rede de saneamento e da sinalización no interior. “Son pasos importantes para a mellora de toda a Praza de Abastos”, indica.

Vega destaca que “a Xunta está a investir no noso pobo” e asegura que “dende o Grupo Municipal Popular seguiremos colaborando cos praceiros na xestión de axudas directas e na posta en marcha de máis actuacións para a promoción deste espazo e a posta en valor dos seus produtos de calidade e de proximidade”.