Burela, 27 de marzo, 2021. O Pescados Rubén Burela FS ofreceu dominio, comodidade e infinidade de ocasións na nova estrea, arrincando o periplo da segunda fase con 1-4 na pista do Ourense Envialia. Con 1-3, as Guerreiras ampliaron a fenda con case catro minutos por diante, en inferioridade tras a expulsión de Ale, e responderon á perfección despois fronte á aposta local de cinco.
Ante a presión asfixiante das laranxas as locais tentaron sacar rédito á contra nun encontro de gran ritmo. Nos primeiros compases o Envialia puxo a proba a rede de Sandra Buzón en recuperación; con todo foi a calidade mariñá a que estreou o luminoso, con Cami, no minuto 4, con roubo en pista ourensá e perfecta definición. A primeira perigosa das locais tivo selo dunha antiga burelista, con recuperación de Jenny Lores á que non chegou Sara Moreno. Buscou o Pescados Rubén o segundo, cun pase longo a Ale de Paz que desartellou o pau, no 9, e cun erro de pase de Chiky, que interceptou Jane, no 10. Con cinco minutos para o descanso, as de Morenín non aproveitaron o dobre penalti de Iria Saeta para poñer táboas, estrelándose contra o pau, e pouco despois o brillo da 7 laranxa non perdoou para o 0-2, apoiándose en Leti para internarse pola banda e sentenciar de disparo cruzado. Acariñou Lara Balseiro o terceiro nos seus primeiros compases sobre a pista na recta final, que aínda lle outorgou un segundo dobre penalti a Iria, fronte á gran resposta de Sandra Buzón.
O Envialia tentou sorprender por partida dobre a Jozi Oliveira baixo paus. Pero apareceu a omnipresencia burelista para recuperala nas inmediacións da área ourensá e subir o 0-3 con Ale de Paz. O perfecto entendemento entre Peque e a de Neda a punto estivo de selar o cuarto segundos despois. No 27, Jane ao segundo pau de Luísa Mayara, e Peque, no 28, fronte a Vane tamén rozaron unha nova diana. Cando parecía que cada vez estaba máis preto o premio das mariñás, Mery avisou en estratexia sobre o ecuador da segunda parte para asinar segundos despois o 1-3, en segunda instancia, tras contragolpe de Chiky. Con cinco minutos e medio para o final, Ale de Paz viu a segunda amarela e o Pescados Rubén Burela FS quedou en inferioridade, pero non deixou de pelexar e, contra prognóstico, deu o mazazo definitivo no 37, cunha gran galopada e sentenza de Dany. Respondeu o Envialia con Jenny Lores como porteira xogadora ante a perfecta defensa do Burela que aínda dispuxo de dúas boas oportunidades con Dany e Peque.
Ficha técnica
Ourense Envialia FSF: Vane, Laura Uña, Chiky, Jenny Lores, Iria Saeta, cinco inicial; tamén xogaron Sara Moreno, María Arias, Judith, Mery, Paula, Susana
Pescados Rubén Burela FS: Sandra Buzón, Dany, Peque, Cami, Ale de Pz, cinco inicial; tamén xogaron M. Cortés, Luísa Mayara, Bea Mateos, Jane, Elena Aragón, Lara Balseiro, Jozi Oliveira
Goles: 0-1, minuto 4, Cami; 0-2, minuto 16, Peque; 0-3, minuto 23, Ale de Paz; 1-3, minuto 31, Mery; 1-4, minuto 37, Dany
Árbitros: Vilas López // Menéndez Nistal (Galicia). Por Ourense amarela a Iria Saeta (minuto 10). Por Burela amarela a Ale de Paz (minuto 10 e 35), Bea Mateos (minuto 33)
Incidencias: Partido correspondente á xornada 1 da segunda fase de Primeira División Feminina disputado nos Remedios de Ourense
Esta familia naceu arredor de cinco irmáns: Paco, Esperanza, Toñito, Juan José (Sé) e Joaquín. Tocoulles vivir tempos difíciles na xuventude, véndose obrigados algúns deles a emigrar. Na reunión estiveron presentes os tres que se ven na foto: Esperanza, Sé e Joaquín, xunto con fillos, sobriños, etc. Unha reunión entrañable, porque había bastante tempo que a familia non se reunía.
A Garda Civil imputa en calidade de investigada a unha veciña de San Miguel de Reinante de 38 anos de idade como suposta autora dun delito de simulación de delito. A persoa investigada denuncio en dependencias oficiais dous cargos indebidos na súa conta bancaria. Iniciouse entón unha investigación policial comprobando documentalmente que os cargos se corresponden con dúas cotas dun préstamo ao consumo contratado pola investigada e ingresado na súa propia conta. Supostamente a persoa investigada pretendía que a entidade bancaria devolvéselle os importes das cotas domiciliadas tras formular a denuncia ante a Garda Civil. As dilixencias policiais foron remitidas á Autoridade Xudicial
Destacou a súa importancia para preservar a memoria histórica e recoñecer o esforzo das xeracións que converteron o porto de Celeiro nun referente pesqueiro. Puxo en valor o rico patrimonio mariñeiro e cultural da Mariña, facendo fincapé “que esta exposición é unha oportunidade para recoñecer o esforzo e a dedicación das persoas que ao longo de cen anos contribuíron ao crecemento e consolidación do porto celeirense”. A mostra, situada na sede da confraría, inclúe maquetas de barcos, fotografías, vídeos históricos, pinturas dos patróns maiores e obxectos singulares como a acta fundacional e maquinaria antiga. A visita complétase cun percorrido por espazos emblemáticos como a lonxa e o porto. Os actos do centenario culminarán coas XXVIII Xornadas Técnicas de Difusión do Sector Pesqueiro, un referente anual do sector.
Este evento anual destaca pola súa coidada selección musical e por ofrecer unha experiencia única na localidade lucense de Vilalba. Tras o éxito da pasada edición, que superou os 6.000 asistentes e contou con actuacións destacadas como as de Iván Ferreiro, Dorian e El Columpio Asesino, o FIV segue apostando por grandes nomes do indie nacional. As primeiras confirmacións do cartel serán anunciadas nas vindeiras semanas, mantendo a emoción e as expectativas para esta nova cita.
Nesta actuación, que serve de antesala para conmemorar o 25N, Día Internacional da Eliminación da Violencia contra a Muller, a coñecida maga realiza unha defensa da igualdade a través da maxia. O espectáculo é para todos os públicos e celebrarase na Casa dá Cultura de Cariño a partir das 18:30 horas. Conta con entrada libre e gratuíta ata completar aforo, polo que todos os interesados poderán acudir sen ter que realizar unha reserva previa.
Foi recibido no Concello polo alcalde, Dani Vega quen explicou que “dentro das visitas que estamos tendo en Ribadeo, recibimos ao Comandante Naval da Coruña e de Ferrol, o capitán de Fragata Javier García, que nos expuxo todo o tipo de propostas e de colaboracións que vamos ter con eles. E desde logo parécenos unha proposta interesante para tamén ter unha relación cos institutos, cos centros educativos e tamén co traballo que realiza en toda esta zona, desde Ribadeo ata A Coruña”. Vega engadiu: “nosoutros dentro da colaboración que estamos tendo con todas as administracións, creo que é positivo seguir nesta liña”.
