O Centro Comercial Histórico de Viveiro organiza os días 27 e 28 unha nova edición do Black Friday, con importantes descontos nas tendas e establecementos asociados ao colectivo empresarial

 Viveiro, 25 de novembro, 2020. Co lema ‘Sácalle brillo ao Black Friday mercando no comercio local’, unha trintena de negocios participarán na campaña, que pretende facer fincapé nun contexto coma o actual, de crise por mor da Covid-19, en consumir nas tendas de proximidade, a fin de estimular a economía tanto de Viveiro coma da comarca da Mariña.

Tendas de sectores coma o téxtil, o alimentario, a decoración ou servizos participarán na campaña, que ofrecerá descontos de ata o 50%. Como novidade e dada a situación de peche perimetral do municipio de Viveiro, aquelas persoas que queiran mercar produtos desde outros puntos da Mariña e non teñan opción de desprazarse poderán desfrutar de envíos gratuítos nas compras nos locais asociados.