Segundo explicou, os últimos indicadores -anteriores ao inicio da pandemia- xa alertaban de que a taxa de pobreza atinxía ao 24% da poboación e que, tal e como adiantaba en maio a ONG Igaxes, os efectos económicos e sociais derivados da actual situación epidemiolóxica “están a afectar especialmente á mocidade e ás persoas con contratos temporais, empurrando cara á pobreza a moitas familias vulnerábeis”.
Pérez volveu reclamar á Xunta a elaboración dun estudo neste sentido para obter unha diagnose certeira sobre o impacto real que está a sufrir o país en termos de pobreza e exclusión social para poder así tomar as medidas específicas necesarias e dotalas das súas correspondentes partidas económicas nos vindeiros orzamentos galegos.
O deputado pola Coruña criticou a falta de eficacia das políticas sociais desenvolvidas polo PP ao longo da última década e subliñou que é preciso combinar políticas de inclusión social a medio e longo prazo con medidas explícitas para grupos en situación de exclusión social. “E para isto é fundamental a dotación orzamentaria destinada, especificamente, a loitar contra a pobreza e a exclusión social”, subliñou.
Por último, Daniel Pérez lembrou ao Goberno galego que está obrigado a establecer os medios adecuados para abordar as situacións de emerxencia neste ámbito de actuación; situar a protección social como parte esencial da política económica, para o que, segundo recalcou, “é preciso xerar emprego de calidade”, e “poñer o crecemento económico ao servizo do desenvolvemento social e do benestar das persoas co obxectivo de acadar un modelo social xusto e equitativo”.
