Representantes institucionais e orgánicos da formación nacionalista acompañaron aos traballadores concentrados na área recreativa dos Robles para arroupar aos membros do comité de empresa que manteñen as negociacións coa multinacional; entre elas, Olalla Rodil e Daniel Castro, parlamentarios electos por Lugo, Maite Ferreiro, deputada provincial e vicepresidenta da Deputación de Lugo, Ana Ermida, responsable comarcal da Mariña e alcaldesa de Barreiros, así como outros concelleiros e concelleiras do BNG na comarca.
O BNG mantén que a solución para manter os postos de traballo e a produción de aluminio na Mariña é a intervención pública de Alcoa, que teima en parar as cubas de electrolise do complexo. “Non se pode permitir que unha multinacional xogue así co futuro dunha comarca e do país”, sinalou Olalla Rodil que critica que o “goberno do Estado siga de perfil, parapetado agora na opción dun comprador”.
Na mesma liña, a responsable comarcal Ana Ermida remarcou “a necesidade de que o Goberno central e a Xunta se amosen firmes e decididos fronte á Alcoa para lograr unha solución para unha industria fundamental para a Mariña”.
