O rexedor municipal destacou que “desde sempre, por parte de todas as corporacións locais, Foz aposta pola Feira do Libro, polos libreiros, pola cultura, por un medio que nos trouxo en época de Covid, en marzo, unha oportunidade de viaxar dunha forma distinta, que é viaxar cos pensamentos, coas imaxes, co noso maxín, ao fin e ao cabo, e evadirnos desa negatividade que había nun momento complicado; e espero que trouxera novos lectores, que é fundamental e é tamén o que deben traer as feiras do libro: achegalo á xente, que sexa unha escusa para mercar esa fábrica de soños e para que tanto os nenos como os maiores non enganchemos á lectura”.
Fran Cajoto tamén salientou que para a Feira do Libro focense “está é a 35ª edición, é a decana na Mariña e na provincia de Lugo e da que estamos moi orgullosos”.
A libreira focense Cielo Fernández explicou que a feira “vaise celebrar dende o xoves 20 ao domingo 23 de agosto, o penúltimo fin de semana de agosto, como ven sendo habitual en Foz. E o horario da feira, tamén coma sempre, vai ser de 5 e media da tarde ata as 10 da noite. A inauguración será o mesmo xoves que abre a feira ás 7 da tarde e correrá a cargo da poeta de Foz Natalia Alonso. Este ano as actividades que normalmente estamos habituados a ver durante a feira, como as presentacións ou as actividades infantís, non se poden desenvolver polas condicións sanitarias porque o protocolo é moi estrito e non o permite. Pero si vai haber presenza de escritoras e escritores, que estarán asinando nunha caseta especialmente acondicionada, para a seguridade tanto deles como dos visitantes”.
A representante da Federación de Librarías de Galicia engadiu que están “moi ilusionados con poder facer esta feira, un ano máis, a pesar das dificultades, pero é unha cita importante pola que a xente me pregunta habitualmente”.
