Somos testemuñas dun continuo e prolongado proceso de desmantelamento dos sectores produtivos desta comarca. Cremos que estes sectores produtivos son esenciais para garantir que as persoas que vivimos na Mariña podamos desenvolver un proxecto vital aquí.
Como profesorado ademais entendemos que somos un elemento fulcral no desenvolvemento da Mariña. Somos parte activa e implicámonos para que a rapazada da Mariña teña un futuro posible nesta comarca, e que contribúan mellor formados e formadas ao progreso da Mariña. Para isto é precisa a existencia dun tecido produtivo e social sólido e en progresión.
Por este motivo sumámonos á convocatoria da manifestación que terá lugar o luns 22 de xuño ás 20.00 horas en Burela: futuro para a Mariña.
Animamos á poboación a acudir á mesma, para visibilizar a importancia que para o futuro da Mariña ten a xeración de riqueza, o mantemento de postos de emprego da comarca, o desenvolvemento de infraestruturas e a calidade dos nosos servizos públicos.