Acisa reparte entre este sábado e domingo, dúas mil postais e cincocentas chapas para celebrar o Día da Nai

 Ribadeo, 2 de maio, 2020. Desde a Asociación de Comerciantes, Industriais, Servizos e Autónomos de Ribadeo explican que “esta humilde campaña é un xesto que queremos ter coas nais de Ribadeo, pero tamén cos propietarios e traballadores dos locais que están abertos para que a nosa vida siga a ser o máis normal posible, dentro da crise sanitaria ocasionada pola pandemia do Covid-19 que estamos a vivir”.

As postais e as chapas atópanse nos establecementos asociados esenciais que están abertos os días 2 e 3 de maio: Panadería Torviso, Gasolineira El Jardín, Os Irmandiños, Panaderías La Plaza, Bis a Bis, Pastelería La Candelaria, Grupo Valcarce, Panificadora del Eo, Beep Informática, Fauna, Morán e nas farmacias asociadas. “Hai locais que abren os dous días e hainos que so abren o sábado”, apuntan desde Acisa.

O colectivo empresarial engade que “respectando as normas do confinamento os nenos e as nenas que acompañen aos seus proxenitores a facer as compras esenciais poderán facerse con este obsequio para entregarlles ás mamás”. Trátase dunha postal de apoio ao comercio local ribadense na que cada quen poderá escribirlle a dedicatoria á súa nai e unha chapa na que se pode ler: “Prohibido renderse”.