Rouco, que adiantou o seu apoio incondicional á comisión de seguimento creada polo goberno municipal, xa que “esta crise sanitaria non ten distincións políticas nin sociais”, considera que “o alcalde e o seu goberno deben actuar na fronte económica, e así o fixemos chegar ao alcalde xa a pasada semana a través do rexistro electrónico do Concello, para que os estude e na próxima reunión da comisión de seguimento poida presentar medidas concretas”.
Para os populares “os efectos económicos desta crise sanitaria xa se están a notar en Burela, e seguiranse a notar durante tempo”. Manuel Rouco considera que “o Concello non ten moita marxe de manobra, pero algunha ten. En primeiro lugar, deberíase elaborar un censo de autónomos e empresas afectados por esta situación, que están a ter redución de postos de traballo ou mesmo o peche da actividade. En segundo lugar, o alcalde e o goberno municipal deberán arbitrar as medidas oportunas para que esas actividades non abonen a parte correspondente do IBI en tanto sufran o impacto da crise, e, en todo caso, incrementar os prazos de abono do imposto, pasando dos dous actuais a alo menos catro. Mesmo se debe considerar a adopción de fórmulas para que os autónomos e empresas afectados poidan abonar o IBI deste exercicio para o vindeiro 2021”.
Rouco tamén considera que “o concello deber crear un fondo de continxencia para aquelas persoas actualmente en situación de desemprego, e para as que sufran tal situación producida polos efectos do coronavirus a partires de agora. Este fondo debería pasar por incrementar as partidas orzamentarias para axudas de emerxencia social reguladas na ORDENANZA REGULADORA DE ACCESO AS PRESTACIONS ECONOMICAS MUNICIPAIS DE EMERXENCIA OU URXENTE NECESIDADE, dotada nos orzamentos prorrogados de 2019 para o presente 2020 con 17.500 euros, e abrir o período de solicitudes canto antes”.
“Neste primeiro paquete de medidas, non estaría de máis exonerar do pago da taxa de recollida do lixo e da auga, así como a redución do imposto de terrazas, ou se é posible a súa supresión, durante o período de duración deste estado extraordinario, a todos aqueles autónomos e empresarios que se vexan afectados por esta crise”, conclúe Rouco.
Medidas sanitarias e sociais
Deste xeito, as medidas propostas engadiríanse á sanitarias e sociais que está a aplicar a entidade local; cuestión que dende o PP “vemos con moi bos ollos e que nós tamén recollemos no documento presentado nas dependencias municipais a semana pasada”. E é que “o aspecto sanitario é fundamental e o Concello ten algunha competencia emanada do texto refundido da Lei de Bases de Réxime Local”, advirten.
Así, e a través da empresa concesionaria do servizo de limpeza viaria, ou outra especializada, propoñen no escrito rexistrado a semana pasada que se proceda á desinfección periódica, en función de criterios sanitarios, de espazos públicos susceptibles de presenza de persoas, aínda estando en vigor o estado de alarma, tales como os espazos inmediatos e próximos a tendas de alimentación e establecementos sanitarios de todo tipo. Rouco considera que outro aspecto a ter en conta é a celebración do mercado dos venres, ante a falla de regulamento (anunciado en reiteradas ocasións por Llano).
No aspecto social, indica Rouco, proponse que é imprescindible que o Concello teña un censo exhaustivo das persoas usuarias do SAF que precisen de axuda para retirar produtos farmacéuticos. A tal efecto, defende que arbitren medidas para que persoal municipal ou do SAF lles leven os medicamentos aos seus domicilios. “E non só a estes efectos, se non a calquera outra situación de emerxencia que se lles presente”, destaca.