Por tanto, sinalou Gonzalo Caballero, “o voto ao PP é o voto a Pablo Casado, a Cayetana Álvarez de Toledo, a Aznar, ao PP que dirixe unha estratexia de confrontación retrógrada e reaccionaria en alianza coa ultradereita de Vox…”. “E nós imos lembrar cada día que pase que Feijóo é o PP, e que o PP é un risco para as liberdades políticas, para os dereitos sociais, para a igualdade e para o estado do benestar”, remarcou.
“En política cada un está onde está. Eu estou no PSOE, e para min é un orgullo ser membro do PSOE porque os socialistas transformamos España para ben dende a Transición ata aquí”, destacou o candidato socialista, quen puxo en valor que o PSOE “loitou polas autonomías, pola sanidade e pola educación públicas, polos dereitos sociais, polas liberdades, polo dereito á interrupción do embarazo, ao divorcio e a unha morte digna, polo matrimonio entre persoas do mesmo sexo…”.
Neste contexto, Gonzalo Caballero advertiu de que “non se pode permitir aos políticos que agochen a súa ideoloxía” porque nas eleccións do vindeiro 5 de abril, afondou, os galegos e as galegas terán que decidir entre “dous modos de entender o país e a sociedade”. E, fronte ao proxecto do PP e os seus “socios” da dereita e a extrema dereita, de “esa España que non suma, senón que desune”, o secretario xeral incidiu en que “nós estamos coa maioría progresista”.
“Imos pedirlle aos galegos e ás galegas que nos acompañen para un cambio de ciclo en Galicia, para respaldar un goberno de coalición progresista en España e tamén para configurar un goberno progresista en Galicia que responda á maioría social de progreso que hai no país”, engadiu o máximo dirixente do PSdeG, consciente da importancia da mobilización de cara a acadar un cambio de ciclo político en Galicia despois de 11 anos do PP de Feijóo na Xunta.
COMPROMISO CON LUGO
Gonzalo Caballero fixo estas declaracións no marco dunha visita a Lugo para manter unha xuntanza coa alcaldesa, Lara Méndez, e amosar o seu compromiso cunha cidade na que, en palabras da rexedora, “Feijóo non inaugurou absolutamente nada en 11 anos de goberno”. “Non ten xestión que poñer en valor en Lugo”, remachou.
“A cidadanía está farta e dicindo basta xa”, sinalou a alcaldesa, consciente de que a cidadanía “quere cambio” e ter un presidente da Xunta que “aposte polas cidades” e co cal “o rural deixe de estar esquecido”. “Necesitamos unha persoa comprometida, como Gonzalo Caballero”, reivindicou, e puxo en valor que xa ten avanzado o seu “compromiso con Lugo” en distintas visitas á cidade.
“Eu estou convencida de que a cidade de Lugo vai responder, porque necesitamos ese cambio na Xunta para seguir crecendo”, manifestou Lara Méndez, ao que Gonzalo Caballero asegurou que a alcaldesa de Lugo terá no vindeiro presidente da Xunta “un aliado” na busca de melloras para a cidade.
“Nos seis primeiros meses de goberno imos desatascar proxectos históricos de Lugo que están atrancados por Feijóo e polo PP. Comprometémonos a poñer en marcha o Museo da Romanización, a desatascar o Plan Paradai e a Ronda Leste”, prometeu o candidato socialista, consciente de que “Lugo merece esa aposta” porque “é fundamental para os veciños da cidade e para toda a provincia”.
“ELECCIÓNS MOI IMPORTANTES”
Despois de apuntar que Feijóo non tivo “empatía” coas cidades porque nelas hai “unha maioría progresista liderada polo PSdeG”, Gonzalo Caballero sinalou que “os alcaldes socialistas son a mellor garantía para o progreso da cidadanía”.
“Hai unha nova Galicia que emerxe para pasar páxina aos once anos de desfeitas de Feijóo e do PP na Xunta. Hai unha nova Galicia que non se resigna, que ten ganas, que quere impulsar o futuro do noso país e de darlle á cidadanía galega unha posibilidade de vivir mellor”, finalizou o candidato socialista, coa vista posta nunhas eleccións galegas “moi importantes”.
Así é que percorrerá Galicia, como avanzou o candidato socialista, “co orgullo, coas ideas e co proxecto que temos para Galicia, cos nosos valores dunha Galicia máis xusta e máis solidaria, unha Galicia que aposte por unha nova política económica, por unha nova política de vertebración territorial, por unha nova política social e que afronte a grave crise sanitaria a causa dos recortes de Feijóo”.