A Mariña, 22 de xaneiro, 2020. 22-1-2020.- Rematado o proceso de eleccións sindicais nas deputacións provinciais galegas, Comisións Obreiras (CCOO) revalida a súa condición de primeiro sindicato en representación. No conxunto do persoal laboral e funcionario, esta organización ten o 40 % de delegados e delegadas, case o dobre que o segundo sindicato.
CCOO agradécelle ao persoal das catro deputacións a súa participación nestas eleccións sindicais e, de xeito moi particular, aos traballadores e traballadoras que apoiaron co seu voto as súas candidaturas. Isto permitiulle conseguir corenta delegados e delegadas de cen que se elixían.
Desde CCOO afirman que «quedan moitos retos por abordar», entre outros, transformar os contratos derivados de programas en postos de estrutura —mediante a súa incorporación á relación de postos de traballo—, estabilizar o emprego para reducir a «excesiva» temporalidade, funcionarizar todo o persoal laboral, desenvolver a carreira profesional —ao abeiro do Acordo de concertación— ou dotar de máis obxectividade as listaxes de contratación.