Marta Nóvoa afirmou que “está claro que o Goberno socialista non ten interese en ofrecer solucións e ningunha estabilidade ás empresas electrointensivas”. “Non aproban o estatuto, nin sequera ensinan o que din ter feito, e convocan unha poxa de interrumpibilidade para a metade do vindeiro ano de 1.000 megavatios, cando antes eran 2.400, eliminando por completo ademais os bloques de 40 megavatios e permitindo só poxar polos bloques de 5 megavatios, o que supón un agravio para os grandes consumidores de enerxía”, indicou.
“Irremediablemente, Galicia vai recibir menos fondos: dunha media de 150 millóns de euros que recibía, agora o Goberno central destina para seis meses só 60 millóns de euros para toda España”, concretou a portavoz popular. Así mesmo, subliñou que “cando gobernaba Mariano Rajoy Alcoa recibía 94,4 millóns de euros ao ano, mentres que co actual Goberno socialista só chega a 42,4 millóns de euros”.
MEDIDAS NA LIÑA DO ACORDADO CON TRABALLADORES E SECTOR
Nóvoa incidiu que “despois de máis de un ano que o prometeran, seguimos necesitando que se aprobe o estatuto para as empresas electrointensivas, e que vaia na liña que indicaron os traballadores e o sector desta industria, de forma que se consiga situar o prezo da electricidade entre 35 e 40 euros por megavatio”.
“Ademais, teñen que convocar a mesa industrial e que se inclúa aos traballadores, tal e como xa temos solicitado desde este Parlamento, adoptando as medidas recollidas no documento enviado polo Goberno galego e tamén ratificado nesta Cámara”, apuntou.