“O obxectivo deste acordo é fortalecer e facer máis competitivo o tecido empresarial da provincia”, dixo José Tomé, que destacou o papel dos empresarios na xeración de emprego e na dinamización da economía. Engadiu Tomé que “o impulso dos sectores produtivos pasa por accións como plans de emprego, de formación e apoio ao emprendemento. Na Deputación, temos en marcha a día de hoxe proxectos deste tipo cun investimento de 7,4M€ e con medio milleiro de persoas beneficiarias”.
Na presentación, o Presidente estivo acompañado polo Deputado de Promoción Económica e Social, Pablo Rivera, e o secretario xeral da Confederación de Empresarios, Jaime López, quen situou á Deputación de Lugo como unha peza chave para a internacionalización das empresas lucenses, tendo en conta ademais que Lugo “polo momento non pode acceder de xeito directo ás axudas do Plan Foexga que xestionan as Cámaras de Comercio”. O Secretario Xeral da CEL apuntou que Lugo é a cuarta provincia exportadora en Galicia, aínda que mellorou a súa posición nos mercados internacionais na última década. En concreto, o ano no que Lugo acadou os seus mellores resultados foi no 2015, no que se exportaron mercancías por valor de 1.174,41M€. Segundo o estudio, existe un volume de exportación estable en torno aos 670M€ nos últimos anos.
Destacou López que, por sectores económicos, a alimentación é o que máis exporta da provincia e que Europa é o destino final de boa parte dos produtos lucenses no exterior. No estudo tamén se elaborou un perfil das principais empresas exportadoras de Lugo, localizadas boa parte delas na capital e con máis de dez anos de existencia, que teñen capital suficiente para facer fronte á internacionalización e que acoden ao mercado cos seus propios medios.
Entre as conclusións, o estudo da CEL apunta que para seguir mellorando a situación do sector exterior e recuperar o ritmo de crecemento de anos anteriores, a provincia de Lugo debe diversificar mercados e produtos, incentivar ás novas empresas para acceder aos mercados internacionais, dotando de músculo financeiro ás que teñen vocación exportadora. O informe tamén recomenda fomentar a entrada en mercados con potencial, aproveitar as vantaxes de atopar un bo socio local nos mercados de destino das exportacións e participar nos múltiples plans, axudas e subvencións dispoñibles.