A concelleira de Servizos Sociais e Familia de Foz, Ana Rojo, anuncia que “maña, día 26, comeza o curso Xuntos nos coidados, impartido por Gema Fernández Rey, psicóloga de AFAN (Asociación de Familiares Enfermos de Demencias Neuroxenerativas e de Alzheimer)”.
A edil engade que “este curso impartirase na Casa de Cultura de Foz, coa colaboración do Concello de Foz, a través da Delegación de Servizos Sociais,e da Consellería de Política Social, e organiza a Federación Alzheimer Galicia (FAGAL). O curso será impartido os días 26 e 27 de novembro e o 2 e 3 de decembro en horario de 17:00 e 19:00, para que todos os familiares coidadores puideran ter un horario adaptado ás necesidades do enfermo. Está destinado a familiares e coidadores de persoas con demencias e outras enfermidades neurodexenerativas”.
Ana Rojo sinala que “aínda hai tempo para inscribirse e pode facerse no teléfono 982.580.616, a través do correo afam.burela@gmail.com ou en Servizos Sociais de Foz, no teléfono 982.13.35.66”.
A concelleira focense de Servizos Sociais explica que “o curso abarca todas as demencias, tanto de alzheimer como de outro tipo, e está orientado a familiares-coidadores para dar estratexias e poder enfrontarse no seu día a día a este tipo de enfermidades. En definitiva está impartido para darlle recursos ás familias, na súa vida diaria, coidando a este tipo de persoas”.
Ana Rojo comenta que “ao remate do curso daranse dous módulos máis, de como adaptar os fogares para o coidado destas persoas, técnicas de apoio, axudas para a súa hixiene e como facer o baño ao enfermo que está demenciado sen que este feito lle produza estrés. Estes módulos serán impartidos por outra profesional, como é a terapeuta de AFAN, que nos dará indicacións de como comunicarnos con estas persoas polo problema dexenerativo-cognitivo que padecen, ademais de na linguaxe. Esta terapeuta tamén nos adentrará nas terapias non farmacolóxicas que poden estimulalos e facilitarllas no seu propio domicilio. O último módulo será de como coidarse o coidador, entrando nas patoloxías que poden xurdir e como previlas, evitando así un síndrome tan coñecido como é o do coidador queimado (burnout), que de non coidarse acaba padecendo o coidador”.
A edil rematou invitando “a todos os veciños e veciñas de Foz que teñan unha persoa ao seu cargo con este tipo de demencias que poden inscribirse aínda a día de hoxe e ata mañá pola mañá neste curso formativo de AFAN. É moi interesante e abarca todo tipo de demencias, para que eles poidan cada vez coñecer máis estas enfermidades que cada día van a máis”.
