Presentación do XXXII Congreso ENCIGA en Viveiro

 Viveiro, 31 de outubro, 2019. Este xoves no IES María Sarmiento, presentouse o XXXII Congreso ENCIGA, que terá lugar neste centro educativo o 14, 15 e 16 de novembro de 2019, no que se desenvolverán diversas actividades, como obradoiros, conferencias, exposicións, rutas e visitas didácticas a empresas da Mariña, visitas ao casco histórico de Viveiro e ao porto de Celeiro, e outras relacionadas co mundo das ciencias no ensino.

Este congreso está organizado por ENCIGA (Asociación de Profesores de Ciencias de Galicia), fundada en 1988 e que tenta mellorar a calidade do ensino nas áreas matemático‑científico‑tecnolóxicas nos niveis educativos non universitarios, e conta coa colaboración do Concello de Viveiro.

Este Congreso Anual de Ensinantes de Ciencias é o acontecemento anual da asociación que, ademais do fin formativo, terá un fin claramente social; para o Concello de Viveiro é unha honra poder colaborar con esta iniciativa e acoller esta actividade de ambito autonómico.