Ana Rojo explica que para posta en marcha do servizo Xantar na Casa no municipio focense “asinouse un convenio por parte do Concello de Foz e do Consorcio de Servizos de Igualdade e Benestar Social, da Consellería de Política Social, o 31 de xullo deste ano 2019. Xantar na Casa é un servizo de comida a domicilio que pretende facilitar e garantir unha alimentación equilibrada e de calidade, adaptada evidentemente ás necesidades das persoas maiores ou dependentes, con déficit de autonomía persoal. Ademais disto as necesidades básicas e instrumentais desas persoas, por exemplo para xente que non pode ir facer a compra ou non pode elaborar a comida diaria”.
A concelleira de Servizos Sociais e Familia engade que “o obxectivo principal é mellorar o nivel de benestar e a calidade de vida desas persoas beneficiarias e das súas familias, mantendo no seu entorno do fogar á persoa demandante do servizo e evitando ou retardando a institucionalización desas persoas. Dende o Concello de Foz avogamos porque cada persoa poida decidir e se quere vivir na súa casa poder darlle este tipo de servizos. A alimentación é de calidade, nutritiva e atendendo os casos de xeito personalizado e individualizado, o quere dicir que para unha persoa que ten hipertensión a dieta vai ser hiposódica e se ten colesterol será hipocalórica, baixa en graxas, etcétera. É comida tradicional pero ao mesmo tempo adaptada á liña en frío, que se chama así porque é cociñada e despois báixase a temperatura rapidamente para que non proliferen as bacterias. Sérvese en bandexas seladas, sen conxelar nin pasteurizar. É comida tradicional cocida e asada, pero non se frite. Sérvese incluso ata o pan ou empanada, sopa, caldo, … Todo tipo de comida tradicional que se coloca en bandexas e as condicións hixiénico sanitarias están garantidas”.
En canto ás persoas beneficiarias, Ana Rojo explica que “hai tres tipos que poden optar a estes servizos: persoas maiores de 60 anos que teñan limitada a súa capacidade de autonomía persoal e sen rede de apoio que poida suplir tal situación, o quere dicir que non vivan con ninguén que poida cociñarlles; ou persoas dependentes que carecen de apoio familiar e que requiren de axuda para a preparación de alimentos; ou tamén persoas menores de 60 anos en situación de exclusión social, tecnicamente avaliada polos Servizos Sociais, e sempre que se estea intervindo dende outro programa para resolver a súa situación de exclusión, como por exemplo unha persoa está recibindo o Risga”.
A edil anima “ás persoas de Foz que queiran ser beneficiarias deste servizo e ás súas familias a que se acheguen aos Servizos Sociais a pedir toda a información que consideren sobre o Xantar na Casa pois alí facilitaráselles sen ningún problema. En canto aos custes, o Concello achega unha parte, a Administración outra e os usuarios abonan 1,67 euros, cantidade que é asumible polas persoas”.
