O Concello de Viveiro substituirá o pavimento deportivo no pavillón municipal

 Viveiro, 25 de setembro de 2019. No día de hoxe celebrouse unha mesa de contratación na que se propuxo a adxudicación para a execución das obras contempladas no Proxecto para a substitución do pavimento deportivo no pavillón municipal de Viveiro, que ten un orzamento de contrata de 134.000,00 €. Inicialmente, estaba previsto realizar a proposta de adxución en agosto; este proceso ralentizouse pola necesidade de informes previos atendendo ás baixas económicas presentadas polas empresas licitadoras.

O proxecto referido xorde ante a necesidade de reposición do pavimento deportivo do polideportivo municipal, que dada a súa antigüidade, tras máis de 20 anos de uso, se atopa estado deficiente.

A actual pista de xogo serve para a práctica de fútbol sala, balonmano e baloncesto; ademais, nela tamén se practican de forma ocasional outros deportes que non requiren marcaxe como, por exemplo, ximnasia rítmica.

A actuación prevista inclúe as seguintes actuacións:
– Retirada do pavimento existente.
– Preparación da soleira base segundo as necesidades do mesmo, incluída a limpeza e o aspirado.
– Subministro e colocación do pavimento deportivo de madeira de haya maciza.
– Marcado de pista deportiva de fútbol sala/balonmano.
– Marcado de pista deportiva de baloncesto.
– Marcado de pista deportiva de voleibol.
– Pintado perimetral e colocación da imaxe corporativa do Concello de Viveiro.

Esta obra, que se inclúe no Plan Único 2019, foi adxudicada por un importe total de 100.500,00 €; dos que 81.914,30 € son asumidos pola Deputación Provincial de Lugo e os 18.585,70 € restantes son abonados polo Concello.