Ana Ermida explica na carta remitida aos departamentos da Xunta que “o concello de Barreiros ten un censo poboacional de menos de 3.000 habitantes, porén a súa poboación flotante multiplica esta cifra por máis do triplo nos meses de verán. Isto supón que os servizos que se precisan, deben estar dimensionados para atender dita demanda; o que require de investimentos importantes para poder levar a cabo ditas execucións.”
Segundo sinalan desde o goberno “a ubicación dos puntos de vertido actuais son en zonas moi próximas á praia, mesmo a lugares tan emblemáticos como a praias de Augas Santas/As Catedrais, e mesmo a Rede Natura, o que supón uns impactos tanto medioambiental como turístico negativos; a maiores dos evidentes de saúde pública que se detectan mesmo nas analíticas realizadas pola propia administración galega.”
Por esta razón, e considerando que a Xunta de Galicia ten competencia na cuestión e varias das súas consellerías poderían estar involucradas na resolución deste problema, o goberno municipal solicita unha xuntanza para abordar esta cuestión coas distintas Consellerías que poden estar implicadas.
A alcaldesa considera que “é imprescindible a colaboración entre administracións para afrontar investimentos desta importancia, en beneficio das veciñas e veciños de Barreiros, das persoas que visitan este municipio e do propio País, que precisa dunha imaxe moderna, avanzada e con servizos propios do século XXI.”
