No acto que tivo lugar na sede da Xunta de Galicia en Lugo, o secretario xeral destacou o aumento nun 51,2% dos contratos asinados cos 18 equipos de alta competición patrocinados na provincia lucense con respecto á tempada 2018-2019. Deste xeito, estes 18 equipos reciben esta tempada un total de 338.085,72 euros mentres que o ano pasado recibiron 223.622,24 euros. Do mesmo xeito, Lete Lasa fixo fincapé na importancia do deporte feminino na provincia de Lugo xa que dos 18 equipos patrocinados, 11 son de mulleres, o 60% do total.
Os equipos patrocinados na cidade de Lugo son o Club Porta XI X.B., o Club Tríatlon Cidade de Lugo Fluvial (dúatlon feminino e masculino), o Club Tríatlon Cidade de Lugo Fluvial (tríatlon feminino e masculino), a Asociación Deportiva Tripenta Terras de Lugo (dúatlon feminino e masculino), o Club Peluquería Mixta Friol, o Club Deportivo Burela Fútbol Sala (fútbol sala feminino e masculino), o Club Hóckey Feminino Meigas, o Club Patíns Lóstregos Lucus, o Club de Loitas Olímpicas Vilalba, o Club Fluvial de Lugo (piragüismo sprint feminino e masculino), o Club Piragüismo Ciudad de Lugo (piragüismo sprint feminino) e o Club Emevé (voleibol feminino e masculino).
Nas súas verbas o mandatario galego agradeceu o “esforzo e a aposta decidida polo deporte galego” que fai a ABANCA e que posibilita “todos estes datos que serían inalcanzables doutro xeito”. Coa súa aposta, “o maior banco de Galicia amosa ás entidades privadas que o patrocinio deportivo ten un retorno importantísimo que axuda a calquera empresa a medrar económica e socialmente” .
191 equipos en toda Galicia
En total vense beneficiados nesta convocatoria de 2019, 191 equipos en toda Galicia, un 12% máis que en 2018 (171) e un 115% máis respecto ao primeiro ano do Plan, na tempada 2008-2009 que contou con 89 equipos patrocinados. Destes 191 equipos que finalmente asinarán os convenios (foron invitados ao programa un total de 213), 100 son equipos masculinos, 85 femininos e 6 mixtos. Un ano máis, o número de equipos femininos patrocinados volve medrar, 28 equipos na tempada 2008-2009 e 72 no exercicio pasado, polo que este ano medran nun 18%.
Como novidades do Plan, cómpre destacar a simplificación administrativa que supón unha axilización nos pagos que pasan de tres a dous, así como a creación dun grupo de patrocinio para modalidades e especialidades olímpicas e paralímpicas con equipos en campionatos de España de máximo nivel (karate, loita, natación e ximnasia) e a ampliación dos equipos que participen no terceiro máximo nivel en modalidades e especialidades olímpicas e paralímpicas (fútbol e baloncesto masculino e feminino e voleibol feminino).
Desde que o Plan botou a andar na tempada 2009-2010 consignáronse a este aspecto preto de 24 millóns de euros.