Alfredo Llano explicou que “me despracei ata a Subdelegación do Goberno en Lugo para falar con Eduardo Toba, que é o xefe de Área de Fomento, máis estaba a subdelegada, e estivemos falando dun tema moi importante para a comarca e para Burela que é o trazado da autovía que vai de Barreiros a San Cibrao. Agora mesmo está a punto de rematar a fase de alegacións do tramo que vai de Barreiros a Foz, e o que vai de Foz a Burela está na fase de información. Todos os Concellos están informando das afectacións que hai e todo o que é pertinente para facer o proxecto”.
O alcalde dixo que “en Burela como temos a suposta trazada que vai cruzar o noso concello, estiven aquí para falar cos responsables de Fomento para que se coloque un enlace entre a autovía e o Hospital da Costa. Sería un enlace interesantísimo no aspecto de que é moi importante que teñamos unha boa comunicación cando chegue un momento de urxencias, para ir pola autovía e comunicarse inmediatamente co hospital, e ao mesmo tempo tamén lle damos un enlace da autovía a Burela. Quedaron en que van estudalo tecnicamente. Ven case todas as posibilidades dado que a distancia é curta, non é moita a obra que hai que facer. Hai unha rotonda preto do hospital que posiblemente se modificará para adaptala aos enlaces da autovía. Creo que é algo importante para Burela, para o uso do hospital e polo tanto vimos necesario plantexalo agora na fase de información”.
O rexedor subliñou que “houbo unanimidade ao cen por cen. En principio somos optimistas porque si que ven a necesidade de facer ese enlace, ademais está moi xustificado sobre todo pensando nas urxencias hospitalarias que poida haber no seu momento. Tamén aproveitando, o mesmo concello de Burela tería un enlace aínda que vai ter outro, xa fora do concello, que vai ser en Cangas de Foz, e outro que posiblemente estea situado despois de Burela indo cara a Viveiro”.
Alfredo Llano comentou que “tamén lles plantexei a cartelería da A-8, como presidente da Mancomunidade. Sería interesantísimo colocar un cartel grande no que apareceran todos os concellos e os enlaces máis importantes. Hai outros carteis noutras autovías e autopistas de Galicia onde aparecen as saídas para determinados lugares, poderían aparecer Viveiro, Xove, Cervo, Burela, Foz,… Tamén lles fixen a suxestión, aínda que está ben indicada a saída do hospital na A-8, pero parécenos que está algo escasa dado que queremos que se poña que está en Burela e que conteña a distancia que hai desde o enlace da autovía ata Burela. Agora estamos agardando porque beneficiaría ao conxunto da comarca e ao noso concello”.
