O programa popular para Burela recolle ambiciosos aspectos en materia de turismo entre os que se atopa dar prioridade á tramitación do expediente de declaración das Festas Patronais de Burela como de Interese Turístico Galego, así como o caso da Semana Santa de Burela, “algo no que o partido socialista local non parece ter o máis mínimo interese porque nada fixo para o seu inicio, co imprescindible trámite plenario, nestes últimos catro anos”.
No caso das Festas Patronais, Sonia López fixo especial fincapé na posibilidade de darlle un “recoñecemento específico ás espectaculares alfombras florais que os veciños e veciñas de Burela elaboran con tanto mimo e paixón”. Para iso, tal e como indicou a Directora Xeral, “sería imprescindible contar cunha asociación forte que sexa referente”.
A candidata da lista popular fixo súas as palabras que no seu día manifestou Rouco: “Burela ten que deixar de ser o irmán pequeno do turismo na Mariña” e para iso debemos facer tódolos esforzos necesarios para “poñer a Burela no mapa turístico”.
