A estadía media nos establecementos turísticos da provincia medrou nun 8,5% no primeiro trimestre do ano

 Lugo, 15 de maio de 2019.- A estadía media nos establecementos de aloxamento de Lugo medrou no primeiro trimestre un 8,5%, situándose o tempo que os viaxeiros permanecen na provincia nunha das cifras máis altas dos últimos anos pese ao efecto de Semana Santa, que este ano celebrouse en abril. O delegado territorial da Xunta en Lugo, José Manuel Balseiro, destacou tamén o bo dato que achega o turismo internacional, que medrou nun 8,7%.

Así se desprende dos últimos datos publicados polo Instituto Nacional de Estatística (INE) que revelan que nos tres primeiros meses visitaron Lugo máis de 80.000 viaxeiros, que realizaron 156.000 pernoitas.

A capital
O municipio da capital rexistra datos moi similares, cun incremento da estadía media do 8,8%; producíronse máis de 5.000 pernoitas, un arranque de ano que só superou o 2018 -contando coa Semana Santa- e que está, polo tanto, por riba dos exercicios anteriores.

O mercado internacional amosa un incremento moi notable, dobrando os niveis do pasado ano e situándose en preto de 9.000 noites. Outro bo dato para o sector é a subida das tarifas hoteleiras na cidade neste primeiro trimestre –un 4,5% –, situándose en 43,0 euros de ingreso medio por habitación ocupada. Tal circunstancia provoca en esencia que neste período melloren tamén os niveis de rendibilidade hoteleira.