As deputadas Raquel Arias do PPdeG, Patricia Otero do PSdeG-PSOE, Olalla Rodíl do BNG e a eurodeputada Lídia Senra de En Marea, falarán sobre a súa experiencia como mulleres e representantes políticas nas organizacións políticas, na administración pública e nas institucións, desde a perspectiva de xénero e tendo en conta cuestións como a paridade, o teito de cristal, a corresponsabilidade etc. Do mesmo xeito, “o debaté versará sobre as políticas públicas feministas e de igualdade que se promoven desde as administracións públicas galegas e a súa resposta ás fendas de xénero que detectamos no ámbito social, económico, cultural etc”.
Aproveitando as próximas convocatorias electorais, desde o Observatorio da Mariña
pola Igualdade quixeron “poñer sobre a mesa as propostas de futuro dos diferentes
partidos políticos e a súa resposta ás demandas do movemento feminista que leva
anos artellándose en Galicia”. É, sen dúbida, unha boa oportunidade para achegarse
ao discurso feminista das mulleres que nos representan en gobernos, parlamentos e
administracións locais, e “facer balance do camiño que aínda queda por percorrer”.
O acto estará presentado pola socia e directiva do OMI Lucia Canoura e moderado
pola, tamén socia, investigadora, tradutora e profesora de universidade, Olga Castro.
