Os participantes da especialidade Dinamización, Programación e Desenvolvemento de Accións Culturais realizaron unha breve visita explicativa da contorna e do Santuario de Nosa Señora das Virtudes, que conta con varias pinturas murais medievais e góticas e un ex voto mariñeiro de 1606, un dos máis representativos de Galicia, facendo do Santuario un enclave de gran riqueza patrimonial e artística. Así mesmo realizouse unha explicación representativa da Festa das Cruces que se celebra anualmente o Luns de Pentecoste, declarada de Interese Turístico Galego.
Estas visitas inscríbense dentro dunhas accións máis globais que se están a desenvolver por parte dos alumnos do obradoiro de emprego Ribadeo co Camiño, co obxectivo de poñer en valor e facilitar o acceso e coñecemento do patrimonio que atesoura Ribadeo, especialmente aquel ligado ao Camiño de Santiago ao seu paso polo concello. Nesta liña, creouse a figura de atención ao peregrino na que os participantes no obradoiro acollerán aos peregrinos e peregrinas en tres espazos diferentes (Oficina de Turismo, Albergue Municipal de Peregrinos e Santuario de Nosa Señora das Virtudes), ofrecéndolles información especializada e máis próxima a aqueles que se acheguen ata Ribadeo.
