Lugo, 27 de novembro de 2018.- O delegado territorial de Lugo, José Manuel Balseiro, participou hoxe na inauguración dun novo establecemento turístico que abre as súas portas en Ribadeo e que foi apoiado polo Grupo de Acción Local do Sector Pesqueiro (GALP) A Mariña-Ortegal cunha achega de 200.000 euros.
Durante a inauguración do Hotel Restaurante Javier Montero, Balseiro subliñou o labor que realiza o GALP, con financiamento da Consellería do Mar, para reforzar os sectores da pesca e o turismo na comarca. Neste sentido, apuntou que esta entidade “está involucrada no territorio, co que é capaz de pulsar as necesidades reais e darlles resposta a través de proxectos tanto produtivos como de índole social”.