O Concello de Burela acolleu unha xuntanza dos centros de ensino co inspector de educación na que se abordaron as necesidades relacionadas coa inmigración

Burela, 28 de xuño de 2018. No Concello tivo lugar esta mañá unha xuntanza dos directores dos catro centros de ensino de Burela co inspector de Educación. Ao encontro asistiron tamén o alcalde, Alfredo Llano, a concelleira de Servizos Sociais, Patricia Otero, a traballadora social, a educadora familiar e a psicóloga da inmigración.
Otero explicou que “foi un encontro solicitado polo Concello ao inspector de Educación a petición dos centros de ensino: IES Perdouro, IES Monte Castelo, CEIP Virxe do Carme e CEIP Vista Alegre”.
A edil burelesa contou que “o que se lle trasladou ao inspector foron as necesidades detectadas no ámbito educativo nos centros e referidas sobre todo ao colectivo inmigrante. Quedamos en seguir traballando unidos e en manter novas xuntanzas a partires de setembro, coincidindo co inicio do curso escolar”.