O concerto complementa a mostra fotográfica ‘Galicia-Cabo Verde: unha irmandade’ e unha exposición da ONG Mans Unidas sobre a muller e a niñez en África que inaugurou tamén hoxe Xabier Pardiñas, Tenente Alcalde e Concelleiro de Cultura e Turismo do Concello de Alfoz, e poderán visitarse durante o mes de xuño.
A emigración, a identidade ou a situación da muller son algunhas das cuestións que centran os temas de BatukoTabanka. A agrupación reivindica a música tradicional de Cabo Verde ao tempo que difunde a súa cultura entre a sociedade galega, visibilizándoa e favorecendo actitudes de respecto cara a poboación migrante. Así o fan mentres baten con forza e alegría sobre un pano pregado que colocan entre as pernas, o batuko, e mesmo saíndo a bailar nalgunhas cancións.
