O BNG de Mondoñedo volve a alertar do risco que hai polos desprendementos de terra na LU:124

Mondoñedo, 8 de febreiro do 2018. Tras o desprendemento do noiro que se produciu na tarde de onte na LU: 124 ao seu pola parroquia do Carme, e que obrigou a cortar a estrada para realizar os traballos de limpeza da calzada, os nacionalistas ven con preocupación que estes problemas sexan unha constante cada vez que haxa un temporal de chuvia como o que nos está afectando estes días.
O portavoz nacionalista no concello de Mondoñedo, Eloi Cabanas, declara que o BNG xa ven alertando en varias ocasións da mala calidade da construción do tramo da LU: 124 comprendido entre Mondoñedo e Lindín. “Taludes en vertical e co recheo da ampliación do firme con materiais de pésima calidade que, segundo os técnicos consultados cando estabamos no goberno, non compactará e durará pouco”.

-QUE SE INSPECCIONE A ESTABILIDADE DOS TALUDES DE DESMONTE-
O suceso afortunadamente non provocou danos humanos nin materiais xa que nese momento non circulaba ningún coche polo lugar e, ante o risco de que se produzan novos desprendementos, os nacionalistas urxen ao concello de Mondoñedo para que inste á Xunta de Galicia para que inspeccione a zona de forma inmediata e comprobe a estabilidade dos taludes comprendidos entre Mondoñedo e Lindín e se analicen as medidas a adoptar para evitar novos escorregamentos.