A Casa da Cultura de San Cibrao acolle ata o 2 de xaneiro a exposición “Cartas de amor”

Cervo 21-12-17. É unha exposición, formada por 15 ilustracións, promovida pola Secretaría Xeral de Igualdade, que a edil de Muller e Igualdade do Concello de Cervo, Pilar Armada, conseguiu traer ao municipio.

Pretende establecer un paralelismo entre o mundo romántico das primeiras relacións de parella e a crueldade que, ás veces, vai asociada a elas. Deste xeito podemos ver os traballos de dous premios nacionais de ilustración, Miguel Calatayud, e de cómic, Paco Roca; así como de diferentes figuras galegas, como Patricia Castelao, Pirusca ou David Pintor, entre outros moitos; que plasman nunha imaxe situacións ou momentos que consideraron violentos entre adolescentes, co obxectivo de mudar esas actitudes por outras nas que prime o respecto á parella.

É unha mostra que convida a reflexionar, a escoitar o que os corazón din, pero sempre pensando no respecto e na liberdade das persoas que están ao noso carón.