Suárez Barcia dixo que “afortunadamente xa está superado este incendio que tivemos aquí en Ribadeo, en Noceda, na parroquia da Devesa, durante toda a tarde e parte da noite do día de onte. Afortunadamente sen ningún problema agora, pero houbo momentos críticos na tarde noite de onte porque a pesares de que houbo moitos medios, e teño que destacar a colaboración e a entrega de todos eles desde Protección Civil do Concello, a Policía Local, a Garda Civil, os medios que trouxo a Xunta e incluso o Parque Comarcal de Bombeiros, que tamén se achegou, entre todos intentamos controlar e demos conta dese incendio. Pero tamén axudou un factor moi importante que foi providencial, que foi a chuvia, aínda acompañada durante toda a tarde dese vento infernal, dese vendaval que houbo, que o que fixo mentres non chovía era azuzar e avivar máis o lume, que cando pensabamos que estaba controlado por un flanco desbocábase polo outro, e ao final foi dando conta dunha chea de hectáreas, 20 máis ou menos”.
O alcalde insistiu en que “afortunadamente non houbo ningún problema, as casas que hai alí en Noceda quedaron seguras sempre, pero a min o único que me chama a atención foi que onte estivemos nun punto no que eu mesmo estiven sofocando un lume hai cinco ou seis anos no mesmo sitio”.
O rexedor subliñou que “chama a atención que de 106 ou 108 quilómetros cadrados que ten o concello de Ribadeo que se produzan lumes cun intervalo de cinco ou seis anos no mesmo sitio máis ou menos. É algo que as autoridades competentes nisto, tanto da Xunta, como da Garda Civil ou de quen proceda, deberán estudar polo miúdo a posible orixe deste lume”.
Barcia engadiu: “só me resta felicitar ás forzas que estiveron traballando na extinción do lume porque todos deron o mellor de si, todos fixeron o mellor posible, coordinados e con todos os medios suficientes, que non foron poucos”.
