O Vicedo 21-7-17. A organización da Romaxe Viquinga xa ten pechado o programa de actividades dunha celebración que, na súa segunda edición, levará O Vicedo ata o seu pasado viquingo. Durante dous días, o venres 28 de xullo no propio Vicedo e o sábado 29 de xullo na praia de Area Grande en San Román, desenvolverase un programa pensado para todos os públicos e con actividades para gozar en familia.
A continuación, ampliamos a información do programa adxunto.
Programación do venres 28 de xullo
A II Romaxe Viquinga dará comezo co pregón de Ernesto Sánchez Pombo, ás 19:30h na Casa da Cultura de O Vicedo. Coñecedor do municipio, da súa beleza e tranquilidade, pois está afincado actualmente en O Vicedo, o xornalista comezou a súa carreira no xornal El Progreso de Lugo, sendo xefe de redacción e director-adxunto. Durante doce anos foi correspondente de El País, colaborando tamén con medios como Radio Lugo – Cadena Ser. Xa en 1994 incorporouse ao Grupo Voz como delegado provincial en Lugo. Foi director e presentador do programa de Radio Voz “Camiño de Volta”, a única tertulia de actualidade política da radio galega. En 1999 foi nomeado director de La Voz de Galicia e foi director de Proxectos Editoriais do Grupo Voz.
Ás 19:45h do venres terá lugar na Casa da Cultura a charla do arqueólogo Iñaki Sagredo. Baixo o título de “Resultados da investigación arqueolóxica e histórica en Os Moutillós (2014-2017)”. Os Moutillós, situado no alto dun acantilado sobre a praia de San Román, é un xacemento de tipo defensivo que protexía o embarcadoiro natural do oeste do areal de Area Grande. O director do proxecto que estuda este xacemento falará dos resultados conseguidos durante estes anos. Nos Moutillós atopáronse, entre outros restos, cachos de cerámica e tellas de orixe medieval. Tamén se sabe que o asentamento tivo ocupación humana desde a Idade de Ferro ata a época romana.
Ademais, Sagredo facilitará novos datos obtidos no terceiro ciclo de prospeccións que o seu equipo está realizando as semanas previas á II Romaxe Viquinga. Nas dúas últimas semanas tiveron lugar novas escavacións na área de dunas en San Román e durante a semana do 25 de xullo a investigación trasládase á illa Coelleira, onde unha prospección anterior nos permitiría encadrar os restos achados na época viquinga.
A partir das 20:30h os asistentes poden percorrer a Ruta de Tapas polos locais de hostelería do Vicedo. Haberá ambientación viquinga e música polas rúas.
Programación do sábado 29 de xullo
Ás 12:30h terá lugar o desembarco viquingo na praia de Area Grande en San Román. A continuación, ás 12:45h, comezará o espectáculo matinal con Queiman e Pousa para escenificar a loita entre viquingos e veciños do Vicedo. A recreación da batalla conta coa colaboración dos cabaleiros do Vicedo e outros voluntarios caracterizados para a ocasión, así como as asociacións Hijos del Lobo, Ulf Klan e Gesta Regnorum.
A partir das 17:00h, no campamento, terán lugar diferentes actividades para todas as idades, a cargo de Hijos del Lobo e Gesta Regnorum. Haberá obradoiro de cota de malla e nalbinding para adultos; obradoiros de teas viquingas e de ceras naturais para fabricar candeas para os máis pequenos; e xogos tradicionais e pintacaras para todas as idades. As inscricións para participar faranse ese mesmo día na Oficina de Información do Campamento (adxuntamos mapa). Ademais, a programación de tarde complétase coa charla “Vestir ao guerreiro viquingo” (19:00h) e a exhibición de combates viquingos (20:00h).
A II Romaxe Viquinga contará cun fin de festa de luxo. O sábado 29 de xullo ás 22:30h, no escenario na entrada principal da praia, terá lugar o espectáculo de Milson’s, unha orixinal proposta sonora e visual que non deixará indiferente a ninguén. O grupo neofolk, avalado pola traxectoria dos seus músicos -que tocaron en recoñecidos festivais como o de Lorient ou Ortigueira-, mestura o legado tradicional como as cantigas mariñeiras e os contos de taberna con ritmos e melodías actuais.
Servizo de autobuses
O sábado 29 de xullo haberá un servizo de autobuses para chegar ata a praia de San Román, desde O Barqueiro, O Vicedo, Folgueiro e Viveiro. Haberá diferentes horarios para facilitar a chegada á Romaxe Viquinga e outras dúas opcións para cando acabe a festa pola noite. O prezo é de 1 euro por traxecto.
Nesta edición tamén haberá dúas zonas de mercado viquingo onde os asistentes poderán artesanía, así como comida e bebida.
Sétimo día de concentracións en defensa dos pacientes da Mariña "e a situación, din, manténse como o primeiro día, con carencias graves de persoal facultativo especialista en dermatoloxía, neuroloxía, reumatoloxía, dixestivo, radioloxía, uroloxía, cardioloxía ou medicina interna".
Durante o seu percorrido pola feira, a conselleira puxo de relevo a importancia de eventos deste tipo que contribúen á dinamización das zonas rurais e, neste caso, a dar a coñecer o traballo que desenvolven estes artesáns do ferro.
O conselleiro do Mar asistiu ao xantar da III Festa das Xeracións na carpa da Praza dos Campos.
En total puxeron á venda 300 kgs de mexillóns na carpa instalada para a celebración deste evento gastronómico, que tivo por obxectivo poñer en valor un produto do mar como é o mexillón. A xornada contou con amenización musical. Ata Rinlo se achegaron o alcalde, Dani Vega, as concelleiras de Turismo, Cultura e Benestar Social, Marta Saiz, Begoña Sanjurjo e Elena Sierra, e o conselleiro do Mar, Alfonso Villares.
Tras o partido que se decidiu na tanda de penaltis a favor do equipo da Mariña, o responsable provincial valorou "o encontro como unha mostra do gran nivel do fútbol sala feminino na provincia con dous equipos que ofreceron unha gran espectáculo deportivo" e destacou "o bo ambiente no pavillón coas afeccións apoiando en todo momento ás súas xogadoras".
Chámase Jilgueritos e xa se integrou na Asociación de Comerciantes, Industriais, Servizos e Autónomos (ACISA) de Ribadeo.
Está fixada para as 20:00 horas en primeira convocatoria e media hora despois en segunda. A orde do día inclúe estes asuntos a tratar: lectura e aprobación, se procede, da acta da asemblea anterior; estado de contas da asociación; informe de actividades desenvolvidas; informe do director da Banda; e preguntas e suxestións.
