Clausura Ludiverán 2016 O Valadouro

O Valadouro 1-9-16. O mércores 31 de agosto tivo lugar a clausura de Ludiverán 2016. Os/as participantes (nenos/as de idades comprendidas entre 3 e 12 anos) puideron disfrutar primeiro dunha festa de despedida e unha merenda no pavillón polideportivo municipal e de seguido a visualización dunha presentación de fotos de todo o programa (cos participantes como protagonistas) e a entrega de diplomas de man do alcalde Edmundo Maseda e a concelleira María Mon no salón de actos da Casa da Cultura á que asistiron tódolos nenos xunto ós seus familiares.

O programa, dirixido dende a Concellería de Servizos Sociais, leva varios anos realizándose, este ano houbo cerca de 90 pequenos/as que puideron participar nas distintas actividades (manualidades, talleres de cociña, excursións, coreografías, deporte,…) nos meses de xullo e agosto con horario de 10:00 a 13:00 horas.

Dende o Concello apóstase por axudar ás familias á conciliación da vida familiar e laboral sobre todo na época do verán e cada vez máis os pais/nais solicitan este tipo de programas xa que é un gran apoio nos meses estivais.

Agora tócalles (tanto ós mais pequenos como ós maiores) prepararse para disfrutar das Festas do Oito para poder empezar o curso con bo sabor de boca.