Entregados os diplomas aos asistentes ao curso de alfabetización básica no Centro Ocupacional de Burela

Burela, 26 de xullo de 2016. O Centro de Formación Ocupacional acolleu este martes a entrega de diplomas aos asistentes ao curso de alfabetización básica dirixido ao colectivo de inmigrantes. A formación foi impartida por Radio ECCA e enmárcase no Plan de Inclusión Social, da Consellería de Política Social da Xunta. O Concello de Burela colaborou cedendo gratuitamente as aulas para impartir dito curso, que tivo unha duración de 50 horas lectivas. Celebrouse o pasado mes de marzo e ao mesmo acudiron 15 alumn@s.

A concelleira de Servizos Sociais, Patricia Otero, cre que “a formación do colectivo inmigrante é fundamental para conseguir unha integración social e laboral plena”. E engadiu que “segundo nos comentou o director xeral de Inclusión en agosto sairá publicada a resolución dos novos cursos do Plan de Inclusión”.

No acto de entrega de diplomas participaron o director xeral de Inclusión, Arturo Parrado, o alcalde de Burela, Alfredo Llano, as concelleiras de Inmigración e Cooperación e Servizos Sociais, Angélica Gómez e Patricia Otero, e a delegada en Galicia de Radio ECCA, Almudena Rivas.