Os populares defendemos a residencia de Ribadeo, a necesidade de dotar ao municipio dunha infraestrutura para o coidado dos nosos maiores, como demostramos cando gobernamos a Deputación de Lugo, visitando a obra, apoiando e ratificando a continuidade da construción do centro.
Os populares tamén confirmamos, con total rotundidade, que a Xunta de Galicia si está disposta a poñer o diñeiro para colaborar no seu financiamento. Ata tal punto é así, que o Goberno galego xa trasladou –en agosto de 2014, fai quince meses– unha proposta de convenio de colaboración na que se comprometía a investir 500.000 euros para apoiar a obra.
Pero como é lóxico e comprensible, para materializar esa axuda hai que cumprir a lei, porque somos un partido serio e ninguén pode esperar que non a cumpramos. Nós respectamos a opinión de todos os técnicos, os municipais e autonómicos, e as diferentes visións, pero ninguén pode obviar que, en todo procedemento administrativo, tamén naqueles que sigue o Concello, quen decide a documentación xustificativa que debe achegarse é quen dá a axuda e non quen a recibe.
A normativa é moi clara: todos os concellos que desexen prestar novos servizos (como é o caso da residencia) segundo o disposto no artigo 3 da Lei autonómica 5/2014 de medidas urxentes a reforma da administración municipal e no previsto no artigo 23 da da Lei estatal 27/2013 de racionalización e sostibilidade da Administración local, deben presentar un informe de viabilidade e de non duplicidade. Este mesmo requisito aparece no artigo 68 da a Lei 13/2008, de 3 de decembro, de Servizos Sociais de Galicia.
Durante todo este tempo –quince meses transcorreron– o Goberno municipal non achegou ningún destes dous informes. Nin o de non duplicidade, que só precisa dunha simple solicitude ante a Consellería de Presidencia, nin o de viabilidade, que ofrece garantías sobre o destino final desa construción e determina como se financiará e xestionará a futura residencia.
O alcalde de Ribadeo nin enviou estes informes nin foi capaz de desmentir que a Xunta leve agardando todo este tempo por eles, xa que as respostas remitidas polo Goberno local en contestación á proposta de convenio, non incluían esta documentación. O alcalde decidiu impulsar unha estratexia que supón un claro bloqueo, interesado e partidista, á colaboración da Xunta.
¿Por que o Goberno local non quere achegar estes informes?¿Quen lle prohibe poñer negro sobre branco os datos que confirman a viabilidade da nova residencia? ¿Hai quizá un interese en presentarse como falsa vítima en todo este asunto?
O PP de Ribadeo non está defendendo á Xunta de Galicia. Está defendendo a lei e a aplicación da mesma con rigor. A administración autonómica terá que poder xustificar que entrega medio millón de euros para algo máis que para simple cemento e ladrillos, terá que saber como vai a xestionarse e manterse esa futura residencia. Probablemente nesta última pregunta está o cerne da cuestión. Que o alcalde pretende agochar estes datos. Quere que os veciños non sabiamos que para xestionar a residencia a única alternativa é a privatización.
Unha residencia privatizada suporían prazas a prezos inasumibles pola maioría dos veciños de Ribadeo. Elevados prezos que botarían por terra un dos compromisos que no seu día acordamos todas as forzas políticas e sociais presentes na Comisión pro-residencia: que os veciños de Ribadeo tiveran preferencia e acceso ás prazas do futuro centro. ¿É isto o que pretende agochar?
Por riba de todo, o alcalde tamén demostrou ser un mal xestor, pois nunha actitude que nós entendemos de torpeza acordou renunciar á oferta que lle fixo a anterior conselleira de concertar 40 prazas da futura residencia porque preferiu recibir medio millón de euros para financiar a construción. Preferiu ter medio millón de euros agora que 40 prazas pagadas pola Xunta para sempre. Renunciou a recibir, ano tras ano, entorno a 700.000 euros do Goberno galego, entorno a 1.500 euros ao mes por cada praza pública garantizada.
Non se equivoquen, defenderémolo diante de quen sexa necesario. O Partido Popular non mudou nin un só centímetro a súa posición: Queremos unha residencia e queremos que sexa froito da colaboración entre todas as administracións. Nós esixiremos con contundencia que cada que cumpra coa súa parte e compromiso, tamén a Xunta. Pero o que non podemos pedir a ninguén é que incumpra a lei.
Estamos dispostos a mediar entre administracións. Creo que os veciños esixen máis acordos e menos partidismos. Pero para iso é necesario que cada quen poña da súa parte, empezando polo alcalde, que pode mañá mesmo remitir unha documentación que lle esixe a lei, a mesma pola que a Xunta leva quince meses agardando co silencio como resposta. Tampouco ten sentido ir da man dunha comisión que non reclame ao alcalde esta mínima esixencia. Estamos e estaremos en defensa da residencia de Ribadeo.