A pesar desta vontade de traballo e de colaboración, síntome na obriga de informar aos veciños de Viveiro da inversión real que o goberno autonómico realizou nos últimos anos no municipio evitando, deste xeito, manipulacións mal intencionadas. Non podo escoitar que Viveiro recibiu non últimos 6 anos 97,2 millóns de euros en obras, axudas e servizos impulsados polo goberno autonómico, sen aclarar determinadas cuestións.
Dende o ano 2012, o Concello de Viveiro viu como a Xunta de Galicia reducía a achega de axudas na área de Benestar nunha cantidade próxima aos 300.000 euros. Nuns casos, estas axudas desapareceron integramente, como é o caso da Axuda a Domicilio de Libre Concorrencia, Educación Familiar, Pedagogo, Programas de Voluntariado, Programa de Prevención do Absentismo Escolar e Emerxencia Social; noutros casos, as axudas víronse notablemente reducidas, como acontece coas achegas da Xunta de Galicia para a gardería municipal ou a oficina de información xuvenil.
A redución do presuposto autonómico para os Plans de Cooperación a nivel de toda Galicia foi brutal, pasando dos 8 millóns de euros nos últimos anos a 1,3 millóns no último ano. En 2014, esta redución supuxo que a Xunta de Galicia só concedese ao Concello de Viveiro unha subvención para contratar a 6 socorristas (os mesmos que outros concellos con menos quilómetros de praias), cando habitualmente se lle concedían 8. Do mesmo xeito, Viveiro deixou de recibir as subvencións que se viñan concedendo a través destes plans para contratar a unhas 30 persoas destinadas á limpeza de praias, axuda a domicilio, limpeza de zonas verdes, grumires, etc.
O goberno da Xunta de Galicia, que presume de investir en Viveiro, tampouco concedeu a este municipio a escola obradoiro solicitada a pesar de cumprir todos os requisitos da orde e de presentar, desgraciadamente, un número de persoas desempregadas que permitía optar a axuda sen agruparse con ningún outro concello, sendo o índice de desemprego superior ao doutros municipios limítrofes que, sorprendentemente, si que se beneficiaron desta axuda.
Sorprenden, así mesmo, certas declaracións nas que se afirma que o parque de bombeiros comarcal, con sede en Viveiro, supuxo un investimento no municipio que supera os 5,6 millóns de euros. Cómpre lembrar que o importe do Proxecto Básico e de Execución do Parque Comarcal de Bombeiros de Viveiro ascende a 945.643,15 euros, polo que non se entende a qué corresponden os millóns referidos; non se comprende, tampouco, que se presuma polos investimentos realizados neste parque cando, no seu momento, o goberno autonómico tivo intención de levalo para outro municipio debendo agradecer, neste sentido, as xestións realizadas polo anterior alcalde, Melchor Roel, para que o Parque Comarcal de Bombeiros quedase en Viveiro.
Cando a Xunta de Galicia asegura que Viveiro recibiu nos últimos 6 anos unha media de 16,2 millóns de euros anuais non aclara que nesa cantidade está a incluír os gastos derivados das súas competencias, como poden ser as tarefas de mantemento das estradas de titularidade autonómica ou as obras realizadas en instalacións propias, entre moitas outras. Cuestións que, loxicamente, a Xunta de Galicia debe asumir obrigatoriamente como parte das súas atribucións propias.
Fronte á actitude da Xunta de Galicia, presumindo pola execución das competencias que lle son propias, atópase a actitude do Concello de Viveiro que, en beneficio dos seus veciños, está a asumir certas tarefas que non lle corresponden, como, poden ser a limpeza de determinadas áreas verdes, entre outras.
Por todo isto, insto á Xunta de Galicia a que presente un balance claro dos investimentos realizados nos últimos anos en competencias municipais que, dende aquí xa adianto, non é comparable, nin de lonxe, cos investimentos realizados pola Deputación Provincial de Lugo, unha administración que, ademais de atender ás súas propias competencias, traballa polo benestar e progreso deste municipio.
Insto, así mesmo, a Xunta de Galicia a que demostre unha preocupación real polo Concello de Viveiro, axilizando a tramitación do Plan Xeral de Ordenación Municipal, sendo recibidos por Patrimonio e polo propio Conselleiro de Cultura, Educación e Ordenación Universitaria (reunión xa solicitada ao anterior conselleiro, sen resposta polo momento) ou executando o famoso proxecto de rexeneración da ría de Viveiro.
Viveiro, 13 de marzo de 2015.
A alcaldesa,
María Loureiro García