Burela, 15 de setembro de 2014. A Concellería de Cultura inaugura hoxe ás 17:30 horas unha exposición de artesanía a cargo da artista autodidacta mariñá Carmina Otero. A mostra recolle unhas 50 obras elaboradas pola autora, a partir de diferentes técnicas de reciclaxe. Os interesados poden acudir a ver estas pezas á sala de arte da Casa da Cultura burelesa, en horario de luns a venres de 10:00 a 13:00 horas pola mañá e de 17:00 a 20:00 horas pola tarde. A exposición estará aberta ata o vindeiro 30 de setembro.
Carmina Otero é unha artista que se formou de forma autónoma, inicialmente no campo da restauración de mobles antigos, para logo continuar experimentando con outras técnicas e materiais. A mostra que agora presenta en Burela, forma parte da súa aposta pola reciclaxe artística.
Tal e coma adiantou Monica Pedre, concelleira de Cultura de Burela, “a exposición consta dunhas 50 pezas que nacen da reciclaxe que a propia autora fai dos distintos soportes que utiliza para as súas obras. Entre os diferentes materiais utilizados nesta mostra, poderemos atopar algúns tan diversos como cadros, caixas, botellas ou pedras”.