O próximo domingo 1 de xuño o Grupo de Sendeirismo da ACD.XOVE desprazarase ós Ancares para facer unha ruta de alta montaña, pois sairán de Porto de Ancares (Final de Etapa da Volta Ciclista a España) e subirán ó Pico Cuíña, o máis alto dos Ancares con 1.987 metros de altitude. Seguidamente, subirán ó Pico Mustallar, a montaña máis alta da provincia de Lugo, con 1.924 metros de altitude, para acabar na aldea de Piornedo, onde visitarán as famosas “pallozas”. Son un total de 13,5 quilómetros de dificultade media alta que se prevén rematar en 5 horas e media. A hora de saída está prevista para as 07.00 horas e o xantar realizarase a base de bocadillos. Os interesados poden inscribirse ata o 28 de maio ás 22.00 horas por un prezo de 17 euros (con seguro) ou 15 euros, os federados. Os socios e colaboradores deberán pagar 14 euros, ou 12 no caso dos federados.