Santiago de Compostela, 26 de marzo de 14.- O deputado socialista José Ramón Val acusou hoxe a Feijóo de “desmantelar” o Hospital da Costa “para favorecer as clínicas privadas dos seus amiguiños da alma”. O deputado socialista da Mariña presentou no Pleno do Parlamento de hoxe unha pregunta ao goberno polo deterioro do centro da Mariña logo da súa integración na área de xestión de Lugo.
Val advirte que esta decisión, presentada como a solución a tódolos problemas sanitarios, en realidade supón “unha peor calidade asistencial para os pacientes e unha enorme redución da autonomía de xestión do propio hospital”, tratando aos veciños e veciñas da Mariña “como cidadáns de segunda. Así o constata, dixo, un comunicado asinado por 85 dos 97 profesionais que traballan no centro e que foi presentado días atrás.
Sinala que os médicos poñen de manifesto o deterioro do instrumental, as deficiencias no mantemento das máquinas electrónicas ou a falla de previsión nas adquisicións de material. Sinala que o camión da resonancia pasou dunha estadía de 3 semanas ao mes a tan só unha, deixando a mais de 800 mariñáns pendentes de realizar esta proba, mentres os pacientes teñen que desprazarse 200 quilómetros para realizar probas diagnósticas.
Criticou que Feijóo e o PP “levan anos enganando aos cidadáns da Mariña, primeiro coa ampliación do Hospital prometida polo presidente da Xunta en seis ocasións distintas, e despois coa creación das unidades de Oncoloxía e Cirurxía Vascular”.
Necesidade extrema
Mentres, explicou, a situación agrávase coa perda de especialistas “que se marcharon no concurso de traslados ou que se xubilaron forzosamente, deixando prazas vacantes que non foron cubertas de xeito continuo nin temporal”.
Explicou que o Hospital evidencia unha “necesidade extrema” logo de que caeran preto de 50 metros cadrados de falso teito da área de consultas externas, a necesidade de espazo obriga a reducir corredores e salas de espera, e as consultas de medicina preventiva aténdense en barracóns no aparcadoiro.
Esta situación esperpéntica, dixo, chega a que os internos que teñen que facer unha resonancia son recollidos por ambulancias en urxencias, que os trasladan 50 metros para despois devolvelos ao punto de orixe.