O BNG da Mariña critica que “os recortes orzamentarios, a ausenciade previsión e coordinación na xestion sanitaria rebaixan a calidade asistencial”

A Mariña, 10 de xaneiro de 2014. O BNG mariñao non se da por satisfeito coas explicacións ofrecidas polo SERGAS ante a falta de material e menciñas de uso común nos centros de saúde e Hospital da Costa dos últimos días. Os nacionalistas botan en cara aos responsábeis do SERGAS unha evidente carencia de materias de uso cotiá nos centros de saúde, aos que se lles escatiman material tan básico como son os apósitos. Acusan á xerencia provincial de falta de coordinación e descoñecemento das necesidades das infraestruturas sanitarias da comarca, á que tratan como unha simple sucursal do HULA, deteriorando conscientemente a calidade asistencial na Mariña coa complicidade e beneplácito dos dirixentes comarcais do PP.

OS RECORTES DO SERGAS DETERIORAN A CALIDADE ASISTENCIAL NOS CENTROS DE SAÚDE DA MARIÑA CO BENEPLÁCITO DOS DIRIXENTES DO PP NA COMARCA
Os recortes no financiamento sanitario público aplicado polo Partido Popular dende o goberno galego degradan a calidade asistencial nos centros de saúde da comarca dende fai moito tempo. O BNG denunciou que os centros de saúde sofren especialmente esta situación con carencias de material tan básico como os apósitos para as curas. “Poñen o exemplo dalgún centro de saúde que recibe material deste tipo a día 10 de mes e a día 20 xa esgotan existencias que non se repoñen ate o 10 do mes seguinte”. Con este exemplo botan en cara ao SERGAS unha situación de auténtico estrangulamento da asistencia sanitaria prexudicando en primeiro lugar aos usuarios e en segundo aos profesionais. Os nacionalistas “consideran inaceptábel que material sanitario básico non chegue a cubrir as necesidades asistenciais de 15 días ao mes, polo que demandan solucións inmediatas e respostas dos dirixentes do Partido Popular da Mariña que observa impasíbel o deterioro do sistema.”

O DECRETO DE XESTIÓN INTEGRADA DEGRADA A CALIDADE ASISTENCIAL NA COMARCA COA COMPLICIDADE DOS DIRIXENTES COMARCAIS DO PARTIDO POPULAR
Ao BNG non lle parecen satisfactorias as explicacións ofrecidas polo SERGAS sobre a falta de medicamentos de uso cotiá e común no Hospital da Costa os últimos días. “É evidente que existiu falta de previsión e coordinación tendo en conta que a propia dirección hospitalaria recoñece problemas de distribución coñecidos con anterioridade, tanto é así que a dirección pediu a responsables de área en Burela a paralización das demandas de determinados produtos farmacéuticos dende o día 20 de decembro.”

Os nacionalistas acusan á Xerencia de Atención Integrada de descoñecer as necesidades do Hospital da Costa e dos centros de saúde da comarca, e si as coñece non as atende poñendo por diante as necesidades do HULA sobre a asistencia sanitaria da nosa comarca, á que tratan como unha simple sucursal de Lugo.

Os dirixentes comarcais do PP son cómplices da situación por acción ou omisión.

O BNG reclama explicacións claras sobre a situación xerada nos últimos días no Hospital da Costa da que fai responsábeis aos dirixentes do SERGAS en Burela, Lugo e Compostela. Así mesmo, acusa aos dirixentes do Partido Popular na comarca de “cómplices necesarios do deterioro da sanidade na Mariña por ser os avalistas dun Decreto de Xestión Integrada aprobado o pasado ano que de momento non trouxo ningún beneficio á sanidade pública mariñá”, polo que os acusa de mentir e enganar á comarca ao apoiar por acción ou omisión o deterioro da asistencia sanitaria na comarca.