Gómez Besteiro e Lara Méndez apoiaron a concentración en repulsa polo asasinato de dúas veciñas de Cervo

O Presidente da Deputación de Lugo, José Ramón Gómez Besteiro, e a Vicepresidenta Segunda, Lara Méndez, apoiaron coa súa presenza a concentración de repulsa polo asasinato das dúas mulleres naturais do Concello de Cervo, sucedido este martes. Gómez Besteiro e Méndez uníronse ó resto de asistentes ás 12:00 horas na Praza do Concello desta localidade.

Gómez Besteiro expresou a súa “máis enérxica repulsa e condena deste acto de violencia que tivo como fatal desenlace o falecemento destas dúas veciñas de Cervo”. O Presidente expresou as súas máis sentidas condolencias ós familiares das vítimas e, “como non podía ser menos”, a súa intención de participar no acto convocado esta mañá.

A Deputación enviou esta martes un comunicado oficial co que condenaba o tráxico suceso acontecido en Cervo, no que dúas mulleres desta localidade, de 72 e 45 anos, nai e filla respectivamente, resultaron falecidas.

A Vicepresidenta segunda, Lara Méndez, en representación da Corporación Provincial e como veciña do municipio Cervense, transmitiu ós familiares e amigos das vítimas “as máis sentidas condolencias”. Neste mesmo comunicado, Méndez, insistía na repulsa deste acto violento e manifestaba o desexo de que a investigación policial en marcha, esclarecera o sucedido coa maior brevidade posible.