Nota de prensa
A XUNTA ANUNCIA UN INVESTIMENTO DE 1,5 MILLÓNS DE EUROS PARA MODERNIZAR OS EQUIPAMENTOS COMERCIAIS DE 20 CONCELLOS LUCENSES
* A delegada territorial, Raquel Arias, explicou que as axudas da Consellería de Economía e Industria medran case un 9% na provincia e alcanzan a seis concellos máis que no pasado exercicio
* Mediante as subvencións do Plan Ágora Re-Comercia, a Xunta achega o 75% do investimento que realizan a práctica totalidade dos municipios seleccionados
Lugo, 12 de agosto de 2011.- A delegada territorial da Xunta, Raquel Arias, anunciou hoxe que a Consellería de Economía e Industria realizará un investimento de 1.546.817,71 euros na modernización dos equipamentos comerciais de 20 concellos da provincia de Lugo. Deste xeito, no presente exercicio a contía global asignada á provincia medra preto dun 9% e alcanza a seis concellos máis que no pasado ano.
Arias detallou os proxectos que cofinancia a Dirección Xeral de Comercio ao abeiro do Plan Ágora Re-comercia 2010-2013, achegando na práctica totalidade dos casos ata o 75% do orzamento, e explicou que todos recollen actuacións sobre espazos urbanos ou infraestruturas municipais.
A delegada incidiu no feito de que “as contías das axudas gardan relación directa co investimento proxectado polos concellos”, dado que en todos os casos se outorgou a máxima porcentaxe de subvención autorizada, o 75%, con dúas salvidades: No Vicedo e en Ribas do Sil, atendendo ás características da proposta e aos baremos establecidos, a axuda foi do 70% do custe das obras. Pola súa banda, a actuación presentada polo concello de Trabada só podía ser subvencionada ao 50% segundo as bases da Orde de convocatoria.
Co fin de mellorar o financiamento das obras programadas e axudar aos concellos nunha época na que as administracións están a ver minorados os seus ingresos, a Xunta contempla anticipos de ata o 50% das subvencións.
A relación completa dos concellos beneficiarios está integrada por Cervo, Láncara, Sober, Vilalba, Cospeito, Taboada, Palas de Rei, Pol, Folgoso do Courel, O Vicedo, Abadín, Ribas do Sil, Pedrafita do Cebreiro, Pantón, Lourenzá, O Saviñao, Monterroso, Trabada, Guitiriz e Ribadeo. Catorce deles presentan obras plurianuais, con dotación consignada tamén para o vindeiro ano.
Durante a súa comparecencia, que tivo lugar no Centro de Interpretación da Faba de Lourenzá, a delegada territorial destacou que as iniciativas presentadas polos distintos concellos “embelecen os espazos urbanos para reforzar o atractivo das zonas comerciais”, condición que considera “indispensable para construír un sector comercial galego máis competitivo e dinámico”.
Arias subliñou a aposta da Xunta polo sector comercial a través de distintas liñas de actuación, “que van dende a colaboración cos concellos ata as axudas directas aos comerciantes e actividades de promoción, soportes que resultan fundamentais para o impulso dun sector básico na nosa economía”.
Intervencións na Mariña
Con respecto ás actuacións a desenvolver dentro do Plan Ágora na Mariña, cabe destacar que a subvención de maior contía corresponde ao concello de Ribadeo -79.7757,68 euros-, que proxecta actuar sobre a rúa San Roque e unir a praza do mesmo nome coa rúa Rodríguez Murias para potenciar este punto neurálxico do equipamento comercial do casco urbano da vila.
O concello do Vicedo actuará na zona comercial da estrada de Viveiro. Os traballos, subvencionados con 70.000 euros, supoñen a substitución do mobiliario urbano, sinalización viaria e comercial, creación dunha zona específica para contedores de lixo e a preinstalación para soterramento de liñas na área afectada.
No propio concello de Lourenzá, a Consellería de Economía e Industria sufraga con 54.817,13 euros a remodelación dunha nave industrial no mercado comarcal gandeiro. Por último, ao abeiro destas axudas, Cervo procederá á sinalización das zonas peonís de San Ciprián e Cervo, e no municipio de Trabada crearán un punto de información da Rede de Innovación do Comercio.
Outras actuacións
No conxunto da provincia, será o concello de Guitiriz o que reciba a subvención de maior contía -182.872,22 euros- para a urbanización da rúa Terra Cha, onde se realizarán traballos que consistirán tanto na mellora do saneamento e abastecemento como na remodelación dos elementos urbanos externos.
Os concellos de Vilalba e Cospeito reciben unha subvención de 180.000 euros cada un. No primeiro caso, para a reurbanización da praza Suso Gaioso e da rúa García Mato, e no segundo para o acondicionamento das rúas e zonas do recinto da Feira do Monte e o seu entorno.
En Palas de Rei, o concello procederá a mellorar as condicións dos mercados retallistas da Praza do Concello e da zona da Praza de Galicia, con intervencións sobre o recinto que acolle as feiras mensuais, medidas de regulación do tráfico e instalación de alumeado ornamental. Contan cunha subvención da Dirección Xeral de Comercio de 78.885,53 euros.
Superan os 50.000 euros de subvención as actuacións previstas en Abadín, que destinará o orzamento a mellorar o mercado de Gontán; Pedrafita do Cebreiro, que acometerá obras de canalización nas rúas de acceso ao mercado gandeiro; e Monterroso, onde se reformará a pavimentación e servizos da rúa Rosalía de Castro.
O concello de Pol actuará sobre os eixos comerciais da vila de Mosteiro, e no municipio de Láncara construirase unha beirarrúa na marxe dereita da rúa Rosalía de Castro, na Probra de San Xulián.
Zona sur
As axudas da Xunta de Galicia chegan tamén a seis concellos da zona sur da provincia. Así, o concello de Sober recibirá 176.625 euros para a reforma da zona comercial do campo da feira e a Praza do Toural, e o de Pantón 138.885,71 euros para a reforma da rúa peonil Comandante Cruz Ponte Ordax, no núcleo urbano de Ferreira de Pantón.
O Saviñao procederá tamén á adecuación da zona peonil da Praza de España, para o que percibe 90.077,78 euros, mentres que Folgoso do Courel destinará os 70.065 euros da subvención á rehabilitación da praza de Fondo da Vila.
Por último, en Taboada procederase ao acondicionamento da rúa Real, no tramo que une a praza do Xeneral Muinelo e a praza Riazón, e en Ribas do Sil as actuacións afectarán á zona comercial do casco urbano de San Clodio.
As súas Maxestades de Oriente fixeron o percorrido polas rúas cariñesas en compañía dun grupo de moteiros e moteiras baixo o ritmo das gaitas da banda San Xiaio do Trebo, na que foi unha das tardes máis máxicas do ano.
As palestras terán lugar no Hotel Voar de Ribadeo. Trala do ex banqueiro, as seguintes serán as de José Blanco (24 de xaneiro), Juan Luis Cebrián (31 de xaneiro) e Isabel Díaz Ayuso (14 de febreiro).
Os profesionais sanitarios nada puideron facer pola súa vida. Pasadas 7:30 horas deste xoves, o 112 Galicia tivo constancia do accidente a través do aviso de Urxencias Sanitarias de Galicia-061: unha persoa acababa de ser atropelada en Árbol, á altura do quilómetro 8 da LU-120. Nese momento, os alertadores explicaron que a situación semellaba especialmente grave. De inmediato, os xestores do Centro Integrado de Atención ás Emerxencias solicitaron a acción da Garda Civil de Tráfico e dos servizos de mantemento da estrada. Cando chegaron ao lugar, os servizos sanitarios confirmaron o falecemento da persoa.
A institución provincial mantén abertas todas as vías ao tráfico e traballa de maneira puntual en cada unha das alertas que vai detectando ao longo da xeografía da provincia. Os principais danos pasan pola caída de árbores e pólas, desprendementos de terra e bolsas de auga.
As súas maxestades pasaron polo Centro de Día Residencia de Cervo.
Será a partir das 19:00h na Carpa situada da Avda. Rosalía de Castro (Aparcamento Gadis).
As súas maxestades encheron de ilusión este domingo aos pícaros.
