Nota de prensa
O BNG de Xove pídelle desculpas aos veciños tras o anuncio do PP local do reparto das dedicacións exclusivas antes de ser aprobadas polo Pleno
Desde a formación nacionalista sinalaron que a actitude do Partido Popular local, comunicando a través da prensa as catro liberacións políticas que pretenden aprobar, só se pode interpretar como un “acto de desprestixio da institución que representa a todos os xovenses” ao non agardar polo debate plenario que está convocado para o día 17 de xuño ás 10h00 “tal e como mandan as regras e mais a ética política”.
Esta descortesía cos veciños representados na corporación municipal contrasta coa intención expresada polo primeiro edil na sesión constitutiva do pasado sábado, onde pronunciou a típica frase feita de que: “vou gobernar para todos e cada un dos veciños”.
O portavoz do grupo municipal do BNG, Marco López, asegurou que continuarán traballando “como vimos facendo” para que o sentido común impere na vida política municipal ante esta disposición de nulo espírito negociador e de desconsideración polas institucións. “Estamos logrando coa nosa actitude que o respecto persoal se sitúe por riba das discrepancias ideolóxicas”, asegurou López, “pero agora temos que traballar para que o respecto institucional se asente na vida pública de Xove”.