Nota de prensa
A etapa Port Bourgenay (Francia)-Ribadeo, da regata internacional Transgascogne recala por
A estación náutica de Ribadeo acollerá unha etapa da regata internacional Transgascogne
Esta iniciativa, que conta co apoio de Turgalicia, foi presentada hoxe pola secretaria xeral para o Turismo, que salientou a importancia desta iniciativa para a promoción turística da Mariña Lucense
Volver
Ribadeo (Lugo), 23 de maio de 2011.- A Secretaría Xeral para o Turismo, da Consellería de Cultura e Turismo, Carmen Pardo, presentou hoxe en Ribadeo (Lugo) a etapa Port Bourgenay (Francia)-Ribadeo, da regata internacional Transgascogne, que por primeira vez na súa historia pasará por un porto galego. Ao acto de presentación asistiron asemade o xefe provincial de Cultura e Turismo en Lugo, José Carlos Rodríguez Andina, e o presidente do Club Náutico de Ribadeo, Mario Coto.
Trátase da 13ª edición dunha proba náutica a vela que naceu en 1988 para barcos dun ou dous tripulantes. Este ano a regata parte de Port Bourgenay, na cidade francesa de Telmont Saint-Hilare, no Golfo de Biscaia. Desde aquí, achegarase a Ribadeo, para, desde a vila luguesa, rematar outra vez en Port Bourgenay.
A regata, que se desenvolverá entre os días 24 de xullo e 3 de agosto, ten un percorrido de 650 millas. Do 27 ao 30 de xullo os barcos participantes permanecerán no porto de Ribadeo.
Retorno inmediato
Na súa intervención, Carmen Pardo manifestou que esta acción de promoción vai ter unha repercusión moi positiva para a Mariña lucense e “un retorno inmediato” para o seu sector turístico e o seu comercio en xeral. Segundo Pardo, ademais, desde o punto de vista da promoción nos medios de comunicación, a comarca verase moi beneficiada.
Para a secretaria xeral para o Turismo, o compromiso da Consellería de Cultura e Turismo coa Mariña Lucense no eido turístico non se limita só a esta acción, senón que, entre outras accións, tamén se referiu ao Plan de Competitividade Turística, incluído no Plan de Acción do Turismo de Galicia 2010-2013, que se iniciará este mesmo ano.
Carmen Pardo enmarcou o apoio da Secretaría Xeral para o Turismo, a través de Turgalicia, ao desenvolvemento da regata Transgascogne dentro de programa de patrocinio de grandes eventos deportivos, un por provincia, para a promoción turística global da Comunidade galega. Así, na Coruña este ano, apoiarase o desenvolvemento do evento Pantin Classic, de surf; en Ourense, a Volta Ciclista a España; en Pontevedra, Rolex Fie World Cup, de hípica.