Unha mostra do mal que xestionan as cousas os socialistas alí onde teñen responsabilidade de goberno é o acontecido coa nova rede de saneamento integral de San Ciprián. Anos despois de iniciadas as obras dispoñemos de toda unha rede de modernas tubaxes, un tanque de tormentas -situado no parque Raiña Sofia- que evitará asolagamentos polo colapso da rede de pluviais da vila e unha nova estación depuradora de augas residuais situada no polígono empresarial de Cuíña. Con todo as obras tan só son unha primeira fase, polo que non poden entrar en servizo, como consecuencia do recorte orzamentario decidido polo bipartito.
Esta obra -da que ninguén dubida da súa utilidade- foi proxectada, promovida e redactado o seu proxecto construtivo orixinario pola Xunta en tempos da presidencia de Manuel Fraga. A anterior administración popular aprobou e adxudicou en 2005 a obra cun orzamento de 6,3 millóns euros, pero nada máis chegar socialistas e nacionalistas á Xunta –durante a época do bipartito- decidiron paralizar o contrato sen razón algunha, incluso a pesar de ter que indemnizar á empresa adxudicataria, e aprobar un novo proxecto que veu recortado o seu presuposto a 4,5 millóns de euros, reducción que operou en contra dos intereses dos veciños e veciñas de San Ciprián.
Con 1,8 millóns de euros menos de investimento para acometer o novo saneamento non foi posible rematar toda a rede necesaria. Os socialistas pretendían expulsar o residuo depurado na EDAR directamente ao mar, nas inmediacións da zona de captación de auga da piscifactoría instalada no polígono de Cuíña. Isto facía perigar a viabilidade futura desta empresa, que precisa dunha calidade de auga excepcional para os seus tanques, así como tamén facía perigar os postos de traballo a ela aparellada.
Está claro que nada teñen aportado desde as administracións socialistas para facer realidade a posta en servizo desta obra. Todo o contrario. O recorte do Goberno bipartito significou tanto como comezar a obra polo tellado, e non polos seus cimentos. Debemos esixirlle que acaben aquelo que deixaron a medias polo simple feito de aforrarse uns cartos. Aqueles que recortaron o orzamento deberan asumir agora o custe de construír un emisario submarino para cambiar o punto de vertido. Se non o fan estarán novamente pechando as portas aos veciños de Cervo, aplicando o boicot e a discriminación da que xa fixeron gala desde o Goberno bipartito.
O novo saneamento de San Ciprián sempre constituíu unha das promesas firmes do Goberno municipal e, ao igual que no resto do concello, onde se vén traballando na creación dunha nova rede (Cervo, Cuiña, Sargadelos, A Senra,….) simboliza un compromiso firme polo impulso e universalización destas infraestruturas básicas, polo respecto medioambiental e por facer realidade, avanzar, naquelo que os veciños de Cervo queren e necesitan e outros lles negaron.