Nota de prensa
ADEGA – A XUNTA APROBA MASACRES DE RAPOSOS FÓRA DA TEMPADA OFICIAL
Campionatos “sociais” de caza de raposo autorizados pola Xunta fóra dos períodos de veda
22 de febreiro de 2011. O noso país é un paraíso para os escopeteiros sen escrúpulos. Alén dos xa coñecidos “campionatos” de caza do raposo, que teñen en Galiza o seu último reduto estatal grazas a unha administración escandalosamente permisiva, cando non cómplice, co lobby da escopeta, hai que engadir agora competicións ilegais, como o recente “campionato social de caza do raposo” (sic) organizado polo Tecor “Terra Chá”. Este evento “social” tivo lugar o pasado día 11 de febreiro, 5 días despois de finalizar o periodo hábil de caza e portanto, ilegal, foi autorizado polos servizos provinciais de Conservación da Natureza. Se a administración ambiental non respecta nin as súas propias normas, quen vai mirar pola nosa fauna?
A normativa é clara: a tempada de caza do raposo, segundo a orde de vedas 2010-2011, remata o 6 de febreiro. Pódese, excepcionalmente, solicitar a realización de “ganchos” en zonas concretas dos Tecores, pero só aprobaranse tras unha exhaustiva verificación por parte da Consellería de Medio Rural, das causas (xeralmente danos) polas que se solicitaron.
Outra cousa é solicitar un “campeonato social”?? de caza do raposo, ilegal fóra da tempada de caza, cuxo único obxectivo é matar o maior número de exemplares posíbel, sen tentar sequera camuflalo como unha actividade de regulación e que a administración o autorice! Precisamente este feito, a aprobación por parte da delegación de Medio Rural en Lugo deste “evento social” sinala ben ás claras cal é a política da actual Xunta a respeito da conservación da nosa fauna: a de deixar facer, deixar pasar, todo o que propoñan os cazadores máis cavernícolas.
ADEGA esixe á consellaría do Medio Rural que ao parecer xa abreu unha investigación, non só que impoña unha sanción exemplar aos infractores, senón que depure as súas propias responsabilidades neste vergoñento caso. Xa deixamos por imposíbel que na Orde de Vedas da tempada 2011-2011 a Xunta elimine a bárbara práctica dos “campionatos de caza”, que fai de Galiza o territorio con maior permisividade do estado, último reduto das prácticas cinexéticas máis irracionais e insustentábeis.